?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

ആദിത്യൻ വാളിന്റെ കൈപ്പിടിയിൽ ചുറ്റിയിരുന്ന രുദ്രാക്ഷമാല അതിൽ നിന്നും വേർപ്പെടുത്തി …… പതിയെ ആ വാളിൽ നിന്ന് പുറപ്പെടുന്ന പ്രകാശത്തിന്റെ തീവ്രത കുറയാൻ ആരംഭിച്ചു ഒടുവിൽ അത് പൂർണ്ണമായും ഇല്ലാതെയായി .

ആദിത്യൻ തന്റെ കയ്യിലിരുന്ന വാൾ നിലത്ത് താഴ്ത്തി നിർത്തി ….. ഛേദിക്കപ്പെട്ട് കിടന്ന കാലാസുരന്റെ തല അവൻ കയ്യിൽ എടുത്ത് കത്തുത്ത അഗ്നി കുണ്ഡത്തിനുള്ളിലേയ്ക്കിട്ടു …….

മരക്കൊമ്പിൽ ഇരുന്ന കഴുകൻ പതിയെ പറന്ന് അവന്റെ തോളിൽ വന്നിരുന്ന ശേഷം ശബ്ദിക്കാൻ തുടങ്ങി …….

പതിയെ അവന്റെ കണ്ണുകളിലെ ആ കടും ചുവപ്പ് നിറവും മുഖത്തെ രൗദ്ര ഭാവവും മാഞ്ഞ് പോയി …. അവൻ പഴയ അവസ്ഥയിലായി …….

” …… ക്ലീ ……… ക്ലീ ………. ക്ലീ ………. ”

കഴുകൻ ശബ്ദമുണ്ടാക്കിയ ശേഷം അവന്റെ തോളിൽ നിന്ന് മുന്നോട്ട് പറന്നുയർന്നു . ആദിത്യൻ നിലത്ത് താഴ്ത്തി വച്ചിരുന്ന ആയുധം കയ്യിൽ എടുത്ത ശേഷം ചുറ്റും നോക്കി അപ്പോഴും മയങ്ങി വീണ ആ യുവാക്കൾ അബോധ അവസ്ഥയിൽ തന്നെ നിലത്ത് കിടക്കുന്നതാണ് അവൻ കണ്ടത് …..

” …… ക്ലീ ……… ക്ലീ ………. ക്ലീ ………. ”

ദൂരെ നിന്ന് വീണ്ടും കഴുകന്റെ ശബ്ദം കേട്ടതും ആദിത്യൻ വേഗത്തിൽ അങ്ങോട്ടേയ്ക്ക് ഓടി ….. അവസാനം അവൻ എത്തിപ്പെട്ടത് തകർന്ന് വീഴാറായ പഴക്കംചെന്ന വലിയ ഒരു കെട്ടിടത്തിന് മുന്നിലാണ് ….

നിലത്തിരുന്ന കഴുകൻ ആദ്യം ആദിത്യന്റെ മുഖത്ത് നോക്കിയ ശേഷം കെട്ടിടത്തിന് അകത്തേയ്ക്ക് നോക്കി ശബ്ദിച്ചു …..