?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

അയാളുടെ മനസ്സിൽ ഒരേ ഒരു ലക്ഷ്യം മാത്രമായിരുന്നു , കൂടുതൽ ശക്തികൾ സ്വീകരിച്ച് അമരാപുരിയിലെ ജനങ്ങളെ കാൽകീഴിലാക്കണം പിന്നെ എല്ലാ ജനങ്ങളെയും തന്റെ വിശ്വാസത്തിലേക്കെത്തിക്കണം അതിനു ശേഷം ഓരോ രാജ്യങ്ങളായി ഈ ലോകം തന്നെ തന്റെ കാൽച്ചുവട്ടിലാക്കണം . ഒടുവിൽ മാനവേന്ദ്രൻ കാലാസുരൻ എന്ന നാമം സ്വയം സ്വീകരിച്ചു .

അമരാപുരി ……….

സാധാരണ ജീവിതം നയിച്ചിരുന്ന ആ ചെറു നാട്ടുരാജ്യത്തിലെ ജനങ്ങൾക്കിടയിലേയ്ക്ക് പെട്ടെന്ന് ഒരു അത്യാപത്ത് വന്ന് ചേർന്നു …… ബോധക്ഷയം വന്ന് രണ്ട് മൂന്ന് നാളുകൾ തളർന്ന് കിടന്ന ശേഷം മരണം സംഭവിക്കുന്ന ഒരു തരം അപൂർവ്വവും കേട്ട് കേൾവിപോലുമില്ലാത്തതുമായ ഒരു രോഗം , അതും വളരെ വേഗം ആ രാജ്യം മുഴുക്കെ പടർന്ന് പിടിച്ചു …. കുഞ്ഞുങ്ങൾ മുതൽ വൃദ്ധരായവർ വരെ ഈ രോഗത്തിന് ഇരകളായി തീർന്നു ….. വളരെയധികം ജനങ്ങൾ മരണപ്പെട്ടു . വൈദ്യ ശേഷഠന്മാർക്ക് നോക്കി നിൽക്കാനല്ലാതെ ഒന്നും ചെയ്യാൻ സാധിച്ചില്ല .

ഈ സമയം കാലാസുരൻ ആ കൊടും വനത്തിൽ നിന്നും വർഷങ്ങൾക്ക് ശേഷം ഗ്രാമത്തിലേയ്ക്ക് മടങ്ങി വന്നു ….. തന്റെ വിശ്വാസം സ്വീകരിച്ചാൽ ഈ വ്യാധിയിൽ നിന്നും രക്ഷനേടാൻ സാധിക്കും എന്ന് പറഞ്ഞു കൊണ്ട് രോഗം ബാധിച്ച പലരെയും കാലാസുരൻ മന്ത്രങ്ങളും മറ്റും പ്രയോഗിച്ച് വളരെ വേഗം സുഖപ്പെടുത്തി …..

രാജ്യത്തിനകത്തും പുറത്തുമുള്ള അനേകം വൈദ്യ ശേഷ്ഠന്മാൻ കഠിനമായി പ്രയത്നിച്ചിട്ടും ഏത് രോഗമെന്ന് പോലും കണ്ടെത്താനോ ഒരാളെപ്പോലും സുഖപ്പെടുത്താനോ കഴിഞ്ഞിരുന്നില്ല . ആ സമയത്ത് കാലാസുരൻ രോഗം ബാധിച്ചവരെ വളരെ വേഗം സുഖപ്പെടുത്തുന്നത് ആ നാട്ടിലെ എല്ലാവരിലും അതിശയം ജനിപ്പിച്ചു . ഒപ്പം കാലാസുരനെ ഒരു ദൈവദൂതനെ പോലെ കണ്ട് ബഹുമാനിക്കാനും അനുസരിക്കാനും ആരംഭിച്ചു .