?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

മുന്നിൽ വഴികാട്ടിയായി പറന്ന കഴുകൻ ദൂരെയുള്ള ഒരു ചെറിയ പാറയുടെ മുകളിൽ പറന്നിറങ്ങി . ആദിത്യൻ അതിനടുത്തായി കുതിരയെ നിർത്തി അതിന്റെ തലയിൽ ഒന്ന് തലോടിയ ശേഷം കഴുകന്റെ അടുത്തേയ്ക്ക് ചെന്നു , കഴുകൻ നോക്കുന്ന ദിശയിലേയ്ക്ക് നോക്കി . അൽപം അകലെയായി മരങ്ങൾ തിങ്ങി വളർന്ന് നിൽക്കുന്ന ഘോരവനം അതിനു ചുറ്റും ഇരുട്ട് വ്യാപിച്ചിരിക്കുന്നു . കാഴ്ചയിൽ തന്നെ അൽപം ഭയം തോന്നിപ്പിക്കുന്ന ദൃശ്യം …..

” ….. ക്ലീ ………. ക്ലീ ………. ക്ലീ ……….ക്ലീ ……… ”

കഴുകൻ കുതിരപ്പുറത്തിരിക്കുന്ന ആ ഭാണ്ഡകെട്ടിലേയ്ക്ക് നോക്കിയ ശേഷം ശബ്ദിച്ചു .

അപ്പോഴാണ് ആ സന്യാസി പറഞ്ഞ വാക്കുകൾ അവന്റെ ഓർമ്മയിലേയ്ക്ക് വന്നത് . അവൻ ആ ഭാണ്ഡക്കെട്ട് തുറന്ന് പരിശോധിച്ചു .അതിൽ ഉള്ള വസ്ത്രം എടുത്ത് അവൻ വിടർത്തി നോക്കി . ഒരു കറുത്ത വസ്ത്രം . അത് ധരിച്ചു കഴിഞ്ഞാൽ കണ്ണുകൾ മാത്രമേ പുറത്ത് കാണാൻ സാധിക്കൂ …

” ക്ലീ ………. ക്ലീ ………. ക്ലീ ………. ”

ആദിത്യൻ ആ വസ്ത്രം എടുത്ത് നോക്കിയപ്പോഴേയ്ക്കും വീണ്ടും കഴുകൻ ശബ്ദിച്ചു . ആദിത്യൻ വേഗം തന്നെ ആ വസ്ത്രം താൻ ധരിച്ചിരുന്ന വസ്ത്രത്തിന് പുറത്തു കൂടി ധരിച്ചു ….. വനാസുര വംശജർ ഉപയോഗിക്കുന്നതു പോലുള്ള ആ വസ്ത്രം ……..

അതിനു ശേഷം ആദിത്യൻ തന്റെ ആയുധങ്ങളും കയ്യിൽ എടുത്ത് മുന്നോട്ട് നടന്നു കൂടെ ആ കഴുകനും .

ആദിത്യൻ ആ വനത്തിനുള്ളിലേയ്ക്ക് പ്രവേശിച്ചതും ആ അസുരമൂർത്തിയുടെ മുന്നിൽ തെളിയിച്ച് വച്ചിരുന്ന ദീപം അണഞ്ഞു ….. കാലാസുരന് അവൻ പൂജിക്കുന്ന ദുഷ്ടമൂർത്തി നൽകിയ അടയാളമായിരുന്നു അത് ……..