?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

നൂറ്റാണ്ടുകൾക്ക് മുൻപ്

സൂര്യഗിരിയുടെയും ചന്ദ്രമംഗലത്തിന്റെയും അതിർത്തി പ്രദേശത്തുള്ള ഒരു ചെറിയ നാട്ടുരാജ്യം , അമരാപുരി … ഭൂരിഭാഗവും വനപ്രദേശങ്ങളാൽ ചുറ്റപ്പെട്ട ഒരു നാട്ടുരാജ്യം , കാർഷികവൃത്തി തന്നെയായിരുന്നു ഈ ചെറിയ നാട്ടുരാജ്യത്തിലെ ഭൂരിഭാഗം ജനങ്ങളുടെ തൊഴിലും …… സൂര്യഗിരിയിലെ ജനങ്ങളെപ്പോലെ അല്ലെങ്കിൽ അവരെക്കാൾ മുൻപന്തിയിൽ സൂര്യ ഭഗവാനെ ആരാധിച്ചിരുന്ന ഒരു ജനതയായിരുന്നു അമരാപുരിയിൽ ഉണ്ടായിരുന്നത് .

ഒരു നാൾ ………..

അസുരമൂർത്തികളെ സേവിച്ച് ആഭിചാരക്രിയകളും മറ്റും ചെയ്ത് ദുഷ്ടശക്തികൾ സ്വായക്തമാക്കിയ ഒരു വ്യക്തിയായിരുന്നു ഭണ്ഡപാണി ……. ആഭിചാരക്രിയകൾക്കായി മനുഷ്യജീവൻ ബലി കൊടുത്തു എന്ന കുറ്റത്താൽ അയാളെ തൂക്കിലേറ്റാൻ അമരാപുരി രാജ്യത്തിലെ രാജാവ് കല്പിച്ചു….. അവസാനം രാജകല്പന നടപ്പിലായി ദണ്ഡപാണി തൂക്കിലേറ്റപ്പെട്ടു …..

ജനനത്തോടെ മാതാവ് നഷ്ടമായ ദണ്ഡപാണിയുടെ പുത്രനായിരുന്ന പതിനഞ്ചു വയസ്സുള്ള മാനവേന്ദ്രനും അതോടു കൂടി ആ നാട്ടിൽ സ്ഥാനമില്ലാതെയായി ….. കഴിക്കാൻ ഭക്ഷണമോ കുടിക്കാൻ വെള്ളമോ പോലും ഒരിടത്തുനിന്നും ലഭിക്കാതെ അവനെ എല്ലാപേരും ആട്ടിയകറ്റി…… ക്രൂരനായ മന്ത്രവാദിയുടെ പുത്രൻ , കൊലപാതകിയുടെ രക്തം എന്നീ പേരുകളും അവന്റെമേൽ ചാർത്തപ്പെട്ടു .

അമരപുരിയിലെ ജനങ്ങൾ ദേഷ്യത്തോടെ അവനെ ആട്ടിയകറ്റി ……. അവസാനം മാനവേന്ദ്രൻ ഗ്രാമപ്രദേശത്ത് നിന്നും അമരാപുരിയുടെ ഉൾവനത്തിലേയ്ക്ക് ആശ്രയം തേടി , ഒരു വനവാസിയായി ജീവിക്കാൻ ആരംഭിച്ചു ……