✮കൽക്കി࿐ (ഭാഗം – 8) വിച്ചു [ ചെകുത്താനെ സ്നേഹിച്ച മാലാഖ ] 997

ജെറി അതും പറഞ്ഞ് അവിനാഷിന്റെ എതിരെയുള്ള ചെയറിൽ ഇരുന്നു ….

” ഇങ്ങനെ വെറുതെ ഇരുന്നാൽ മതിയോ എന്തെങ്കിലും ചെയ്യണ്ടേ ….? ”

അവിനാഷ് ഉടനെ ചോദിച്ചു …

” ഞാൻ ആൾക്കാരെ അയച്ചിട്ടുണ്ട് ഇനി ആരെങ്കിലും അവർ മരണപ്പെട്ടത് കണ്ടിട്ടില്ല എങ്കിൽ ആ പണമെങ്കിലും തിരികെ കിട്ടിയാലോ …. പിന്നെ അവന്റെ , ആ വക്കീലിന്റെ മകന്റെ കാര്യം ….. ആരുടെയും സഹായമില്ലാതെ അവനിതൊന്നും ചെയ്യാൻ കഴിയില്ല … അവന്റെ വേണ്ടപ്പെട്ടവരെ നിരീക്ഷിക്കാൻ ഞാൻ പറഞ്ഞിട്ടുണ്ട് , അതിലും നടന്നില്ലെങ്കിൽ അവരെ കൊന്നിട്ടായാലും അവനെവിടെയെന്ന് ഞാൻ കണ്ട് പിടിക്കും …… ”

ജെറി ദേഷ്യത്തോടെ പറഞ്ഞു കൊണ്ട് ചെയറിൽ മുറുക്കെ പിടിച്ചു …..

അപ്പോഴേയ്ക്കും ടേബിളിന് പുറത്തിരുന്ന ജെറിയുടെ ഫോൺ റിങ് ചെയ്തു . അവൻ ഫോണെടുത്ത് കോൾ അറ്റന്റ് ചെയ്ത ശേഷം സ്പീക്കർ മോഡിൽ ഇട്ടു .

” സാറെ ….. സാറ് പറഞ്ഞത് വച്ച് ഞങ്ങൾ ഹൈവെ മുഴുവൻ തിരഞ്ഞു പക്ഷെ ഒന്നും കണ്ടില്ല . സംശയം തോന്നി ഇടവഴികളിലും നോക്കി , അപ്പോഴാ ഹൈവേയിൽ നിന്ന് ഹാർബറിലേക്കുള്ള ഇടവഴിയിൽ പോലീസും ബഹളവും കണ്ടത് ….. അവരെ അവിടെ വച്ചാ കൊന്നത് …. അത് വഴി ബൈക്കിൽ പോയ ഏതോ ചെറുപ്പക്കാർ കണ്ട് പോലീസിനെ വിവരം അറിയിച്ചതാ …. അവിടെ മുഴുവൻ പോലീസ് വളഞ്ഞിരിക്കുവാ . ക്യാഷ് എടുക്കാൻ പറ്റത്തില്ല ….. ”