✮കൽക്കി࿐ (ഭാഗം – 8) വിച്ചു [ ചെകുത്താനെ സ്നേഹിച്ച മാലാഖ ] 997

വെറും രണ്ടോ മൂന്നോ സെക്കന്റിനുള്ളിൽ അത്രയും സംഭവിച്ച് കഴിഞ്ഞിരുന്നു . ആ കറ്റാന പാഞ്ഞത് വിവേകിന്റെ കഴുത്ത് ലക്ഷ്യമാക്കിയായിരുന്നു …. വിവേകിന്റെ കഴുത്ത് ആഴത്തിൽ മുറിഞ്ഞ് രക്തം വളരെ വേഗത്തിൽ പുറത്തേയ്ക്ക് ഒഴുകിയിറങ്ങാൻ തുടങ്ങി .
ഒപ്പം ആദി കറ്റാന വിശിയപ്പോൾ കറ്റാനയിൽ പറ്റിയ രക്തം തെറിച്ച് വീണത് ക്രിസ്റ്റോയുടെ മുഖത്തും …. ആ കാഴ്ച കണ്ട് ഭയം കൊണ്ട് മരവിച്ച ശരീരത്തോടെ എല്ലാം നോക്കി നിൽക്കാൻ മാത്രമേ ക്രിസ്റ്റോയ്ക്ക് കഴിഞ്ഞുള്ളൂ ….

കഴുത്തിൽ മുറിവേറ്റ വിവേകിന്റെ കയ്യിലിരുന്ന തോക്ക് അപ്പോഴേയ്ക്കും നിലത്തേയ്ക്ക് വീണു , മരണ വെപ്രാളത്തോടെ അവൻ തന്റെ രണ്ട് കൈ കൊണ്ടും കഴുത്ത് മുറുക്കെ പിടിച്ചു , ഒപ്പം വേദന കൊണ്ട് അവന്റെ കണ്ണുകളും വല്ലാതെ വിടർന്നു …. കഴുത്തിൽ മുറുക്കെ പിടിച്ച അവന്റെ രണ്ട് കൈകളിലൂടെയും രക്തം ഒഴുകിയിറങ്ങി …

ശ്വാസം കിട്ടാതെ മരണ വെപ്രാളത്തോടെ ബാലൻസ് നഷ്ടമായി വിവേകിന്റെ കാലുകൾ പുറകോട്ട് ചലിച്ചു . ഒടുവിൽ നിയന്ത്രണം നഷ്ടമായി കാറിന്റെ ബോണറ്റിന് പുറത്ത് കൂടി വീണ ശേഷം അവൻ നിലത്തേയ്ക്ക് മറിഞ്ഞ് വീണ് വേഗത്തിൽ കാലിട്ടടിച്ച് പിടയ്ക്കാൻ തുടങ്ങി . പതിയെ പതിയെ ആ വേഗത കുറഞ്ഞ് കാലുകൾ നിശ്ചലമായി ….

വിവേക് ജീവന് വേണ്ടി പിടഞ്ഞ ശേഷം ഒടുവിൽ ജീവൻ നഷ്ടമാകുന്നത് ഒരു പ്രതിമ കണക്കെ ക്രിസ്റ്റോ നോക്കി നിന്നു .