✮കൽക്കി࿐ (ഭാഗം – 8) വിച്ചു [ ചെകുത്താനെ സ്നേഹിച്ച മാലാഖ ] 996

ഉടനെ ക്രിസ്റ്റോ ഭയം കൊണ്ട് പുറകിൽ നിന്ന് വിളിച്ച് പറഞ്ഞു ….. അത് കേട്ടതും വിവേക് ഭയത്തോടെ ഇരുകൈകളും കൊണ്ട് തോക്ക് മുറുക്കെ പിടിച്ച ശേഷം ആ യുവാവിനെ നോക്കി ….

” പറയടാ ….. എന്തിനാ ? എന്തിനാ അവനെ കൊന്നത് , ആരാ നീ ? ”

വിവേക് വീണ്ടും പതറുന്ന ശബ്ദത്തോടെ ചോദ്യമുയർത്തി .

” ഹ …. ഹ … രാഹുലിനെ കൊല്ലുക മാത്രമല്ല ….. കോടിക്കണക്കിന് രൂപയുടെ കള്ളപ്പണവുമായി ഒരു സംഘം ഹൈവേയിലൂടെ വരുന്നുണ്ടെന്ന് പോലീസിന് ഇൻഫർമേഷൻ കൊടുത്തതും ഒടുവിൽ നിങ്ങൾ ആ വഴി പോകാതെ തിരിഞ്ഞ് ഇതിലേ വരാനും ഇപ്പൊ ഇവിടെ ഇങ്ങനെ എന്റെ മുന്നിൽ നിൽക്കാനും കാരണം , അതും ഞാനാ …. ”

അയാളത് പറഞ്ഞതും വിവേകും ക്രിസ്റ്റോയും ഒരു ഞെട്ടലോടെ അയാളെ നോക്കി …..

” പിന്നെ ഞാനാരെന്നുള്ള ചോദ്യം , അതിന്റെ ഉത്തരം പറയേണ്ട ആവശ്യമെനിക്കില്ല …. പക്ഷെ കാരണമെന്തെന്നറിയാതെ നീയൊക്കെ ചാവുന്നത് ശരിയല്ലല്ലോ അതുകൊണ്ട് പറയാം . നീയെല്ലാം കൂടി നശിപ്പിച്ച ഒരു കുടുംബത്തിലെ അവസാനത്തെ കണ്ണി . ആക്സിഡന്റിന്റെ മറവിൽ നീയൊക്കെ കൊന്ന് തള്ളിയ അഡ്വക്കേറ്റ് വിശ്വനാഥിന്റെയും ജയലക്ഷ്മിയുടെയും മകൻ , നീയൊക്കെ ചേർന്ന് തട്ടിക്കൊണ്ട് പോയി മാനം നശിപ്പിച്ച അനശ്വരനാഥിന്റെ ചേട്ടൻ ….. ”

കത്തുന്ന പകയോടെ ആദി അത് പറഞ്ഞ് നിർത്തിയതും വിവേകിന്റെ കണ്ണുകൾ വിടർന്നു ,