‘ വേഗം പുറത്തേയ്ക്ക് പോക . ‘

എന്ന് മനസ്സിൽ ആരോ പറയുന്നത് പോലെ തോന്നിയതും അവൻ വേഗം വാളും കയ്യിലെടുത്ത് ഗുഹയ്ക്ക് പുറത്തേയ്ക്ക് ഇറങ്ങി മുന്നോട്ട് നടന്നു. കുറച്ച് ദൂരം പിന്നിട്ടതും ഒരാൾ ഓടുന്നതും ഒപ്പം പാദസ്വരത്തിന്റെ ശബ്ദവും കേട്ടാണ് അവൻ ആ ദിശയിലേക്ക് തിരിഞ്ഞ് നോക്കിയത് . അപ്പോൾ കണ്ടത് സ്വപ്നത്തിൽ കണ്ട രൂപമുള്ള യുവതി വഴിയറിയാതെ ഓടുന്നതാണ് . പെട്ടെന്ന് അവന്റെ ഓർമ്മയിൽ വീണ്ടും ആ യുവതിയുടെ രൂപം തെളിഞ്ഞു വന്നു , പക്ഷെ ഇപ്പോൾ ആ അവ്യക്തമായ മുഖത്തിന് പകരം വ്യക്തമായ പുഞ്ചിരിക്കുന്ന യുവതിയുടെ മുഖമാണ് തെളിഞ്ഞ് വന്നത് . ആ യുവതി ഇതാ തന്റെ മുന്നിൽ നിൽക്കുന്നു പേടിച്ച മുഖവുമായി മുൻപിലെ മരണത്തെ കണ്ട് പേടിച്ച് . ആദ്യമായി അവളെ കണ്ട ആ നിമിഷം .

……………………………………………

ആദിത്യൻ തന്റെ ചിന്തകളിൽ നിന്ന് ഉണർന്നു . മുന്നിലൂടെ ഒഴുകുന്ന നദിയിലേക്ക് അവൻ ഒന്ന് നോക്കി .

‘ അവൾ എല്ലാം മനസ്സിലാക്കിയിരിക്കുന്നു . ഞാൻ ആരാണ് എന്നുൾപ്പടെ …… പക്ഷെ അവളെ എന്തിനാണ് ഞാൻ ആദ്യം സ്വപ്നത്തിൽ കണ്ടത് അതിന് ശേഷം നേരിട്ട് കണ്ടു , മരണത്തിൽ നിന്ന് പോലും രക്ഷിച്ചു . ഇന്ന് അവൾ എന്നെ തേടി ഈ കൊടും വനത്തിൽ എത്തി . അവളെ കണ്ടതിനു ശേഷം ഉറക്കത്തിൽ പോലും തെളിഞ്ഞ് വരുന്നത് അവളുടെ രൂപമാണ് . അവളെ വീണ്ടും കാണണമെന്ന് അതിയായ ആഗ്രഹമുണ്ടെങ്കിലും എനിക്കതിന് സാധിക്കുന്നില്ല . ഇന്ന് അവൾ എന്റെ അടുത്ത് എത്തിയപ്പോൾ എന്റെ ശക്തിയും ദൈര്യവും ചോർന്നുപോയി , ഒഴിഞ്ഞ് മാറാനെ എനിക്ക് കഴിഞ്ഞുള്ളൂ . എന്താണ് എനിക്ക് പറ്റിയത് . മറ്റൊന്നിനെയും ഭയമില്ലാത്ത ഞാൻ അവളെ ആദ്യവും പിന്നെ ഇന്നും കണ്ടപ്പോൾ എന്റെ ഉള്ളിൽ ഭയം വന്ന് നിറഞ്ഞതിന്റെ കാരണമെന്താണ് …. ? ‘