💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

അവളുടെ മനസ്സിൽ സംശങ്ങളാലുള്ള ചോദ്യങ്ങൾ കൊണ്ട് നിറഞ്ഞു . ഒരു നിമിഷം പറന്നകലുന്ന കഴുകനെയും ആ മനോഹരമായ വനത്തെയും നോക്കിയ ശേഷം അവൾ ആ ക്ഷേത്ര കവാടത്തിനകത്തേക്ക് പ്രവേശിച്ചു .

പക്ഷെ ഉയരമുള്ള മരത്തിന്റെ ചില്ലയിൽ ഒരു കൊള്ളിയാൻ ( കാട്ടുമൂങ്ങ ) അവന്തികയെ നിരീക്ഷിച്ചുകൊണ്ടിരിക്കുകയായിരുന്നു . ദൂരേക്ക് പറന്നകന്ന കഴുകനെയും ക്ഷേത്ര കവാടത്തിനകത്തേയ്ക്ക് കയറിപ്പോയ അവന്തികയെയും മാറി മാറി നോക്കിയ ശേഷം അത് കിഴക്ക് ദിക്ക് ലക്ഷ്യമാക്കി പറന്നുയർന്നു .
ചന്ദ്രവംശത്തിന്റെയും സൂര്യവംശത്തിന്റെയും അതിർത്ഥികൾക്കപ്പുറത്ത് സൂര്യപ്രകാശം പോലും പ്രവേശിക്കാത്ത ഇരുൾ നിറഞ്ഞ കറുത്ത വനത്താൽ ചുറ്റപ്പെട്ട മറ്റൊരു സ്ഥലം ലക്ഷ്യമാക്കി . മനുഷ്യരോ മൃഗങ്ങളോ എന്ന് പോലും മനസ്സിലാക്കാൻ സാധിക്കാത്ത മനുഷ്യ ശരീരവും മൃഗത്തിന്റെ സ്വഭാവവും ഉള്ള വനാസുരവംശജർ താമസിക്കുന്ന ആ വനത്തിനുള്ളിലേക്ക് .

……………………………..

” കുമാരീ …… കുമാരീ ……… ”

കവാടത്തിനുള്ളിലേയ്ക്ക് പ്രവേശിച്ചതും അവന്തിക കാണുന്നത് തോഴിമാർ തന്നെ ക്ഷേത്രത്തിനകം മുഴുവൻ തിരയുന്നതാണ് .

” കുമാരി എവിടെ പോയിരുന്നു ? ഞങ്ങൾ ഇവിടെ മുഴുവൻ കുമാരിയെ അന്വേഷിച്ചു . സത്യത്തിൽ ഭയന്ന് പോയി ഞങ്ങളെ വിശ്വസിച്ചല്ലേ കുമാരിയെ ഒപ്പം അയച്ചത് . ”

ഒരു തോഴി അവന്തികയെ കണ്ടതും ഉടനെ അൽപം ആശങ്കയോടെ ചോദിച്ചു .