💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

അവൾ എണീറ്റ് തന്റെ അറയുടെ അടുത്തുള്ള ബാൽക്കണി ലക്ഷ്യമാക്കി നടന്നു . പുറത്ത് പൂർണ്ണ ചന്ദ്രൻ ഉദിച്ചിരിക്കുന്നു അതിന്റെ നിലാവ് കാരണം രാത്രി പോലും പകൽ പോലെ അവൾക്ക് തോന്നി . ഒരു കുളിർ കാറ്റ് അവളുടെ മുടിയിഴകൾ തലോടി ഏങ്ങോ പോയി മറഞ്ഞു . ആ ബാൽക്കണിയിലെ കൈവരിയിൽ പിടിച്ച് നിന്ന് അവൾ ആ പൂർണ്ണ ചന്ദ്രനിലേക്ക് തന്നെ മിഴി ചിമ്മാതെ നോക്കി നിന്നു അപ്പോഴും അവളുടെ കണ്ണുകളിൽ തെളിഞ്ഞ് വന്നത് ആ യുവാവിന്റെ മുഖമാണ് .

‘ എനിക്കിത് എന്താ പറ്റിയത് ? കണ്ണടയ്ക്കുമ്പോഴൊക്കെ ഓർമ്മയിൽ വരുന്നത് ആ മുഖമാണല്ലോ …… ആരാണയാൾ …. ? ‘

അവൾ തന്റെ വലത്തെ കൈ കൊണ്ട് തലയിൽ ഒന്ന് തട്ടി എന്നിട്ട് സ്വയം ചോദിച്ചു .

അവളുടെ ചോദ്യത്തിന് ഉത്തരമെന്ന മട്ടിൽ ആകാശത്തിലെ ഒരു നക്ഷത്രം ഒന്ന് മിന്നി മറഞ്ഞു . അത് കണ്ടതും അവളുടെ മുഖത്ത് ഒരു നാണം കലർന്ന പുഞ്ചിരി വിടർന്നു , മനസ്സിൽ കരുതിയ എന്തോ ഒന്ന് സത്യമാണെന്ന മട്ടിൽ .

……………………………..

പിറ്റേന്ന് രാവിലെ തന്നെ ചന്ദ്രമംഗലം കൊട്ടാരത്തിലേക്ക് കൊട്ടാരം ജ്യോതിശാസ്ത്രി (ജോത്സ്യൻ ) എത്തി . അവന്തികയുടെ ജാതകത്തിൽ പെട്ടെന്ന് തെളിഞ്ഞ് വന്ന മൃത്യുയോഗത്തെ കുറിച്ച് ഓർത്ത് അവളുടെ മാതാവായ അനസൂയയ്ക്ക് അതിയായ ആശങ്ക ഉണ്ടായിരുന്നു .

ചന്ദ്രവംശത്തിന്റെ രാജാവായിരിക്കുന്ന ആത്രേയനും മകൻ അഗ്നിമിത്രനും , അവന്തികയുടെ പിതാവ് ഹിരണ്യദേവും മാതാവ് അനസൂയയും അവന്തികയും കൊട്ടാരത്തിനുള്ളിലെ ക്ഷേത്രനടയിൽ എത്തി , അവിടെ ജ്യോതിശാസ്ത്രി പൂജാ കർമ്മങ്ങൾ ചെയ്യുകയായിരുന്നു .