💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

അതിനു ശേഷം അവന്റെ ജനനം മുതൽ വനത്തിലേയ്ക്ക് മാറ്റപ്പെട്ടതുവരെയുള്ള ദൃശ്യങ്ങൾ ഒരു സ്വപ്നം പോലെ അവന്റെ അബോധ മനസ്സിൽ വന്ന് നിറഞ്ഞു . അവസാനം ഒരു യുവതിയുടെ രൂപമാണ് ആ സ്വപനത്തിൽ തെളിഞ്ഞ് വന്നത് പക്ഷെ അവളുടെ മുഖം വ്യക്തമല്ല . പക്ഷെ ആ യുവതിയുടെ സൗന്ദര്യവും രൂപവും അവന്റെ ഓർമ്മയിൽ എവിടെയോ പതിഞ്ഞു .

പെട്ടെന്ന് അവൻ ഞെട്ടി ഉണർന്ന് വല്ലാതെ കിതയ്ക്കാൻ തുടങ്ങി . ക്രമാതീതമായി ഹൃദയമിടിപ്പ് വർദ്ധിച്ചതും അവൻ തന്റെ വലത്തെ കൈ ഇടതു നെഞ്ചിൽ വച്ചു . എന്തോ ഓർമ്മ വന്നതു പോലെ അവൻ നെഞ്ചിൽ കൈ വച്ച ഭാഗത്ത് പച്ചകുത്തിയിരിക്കുന്ന അർദ്ധ സൂര്യനിലേക്ക് നോക്കി …… സൂര്യവംശം ….. സൂര്യഗിരി …….. അവന്റെ ഓർമ്മയിൽ ആ വാക്കുകൾ തെളിഞ്ഞ് വന്നു . കയ്യിൽ മുറുക്കെ പിടിച്ചിരിക്കുന്ന വാളിലേക്ക് അവൻ നോക്കി …… ” സൂര്യ അസ്ത്ര ” അവന്റെ ഓർമ്മയിൽ നിന്ന് നാവിലൂടെ വാക്കുകളായി ആ നാമം പുറത്തേയ്ക്ക് വന്നു .

” അപ്പോൾ ഞാൻ ആദിത്യൻ …… അല്ല ആദിസൂര്യൻ , വർഷങ്ങളോളം എന്റെ ഒപ്പം നിന്ന് എനിക്ക് എല്ലാവിധ അറിവുകളും പകർന്ന് തന്നത് എന്റെ പിതാമഹൻ . ”

ആദിത്യൻ സ്വപ്നം പോലെ കണ്ട തന്റെ ഭൂതകാലത്തിലെ ഓരോ സംഭവങ്ങളും ഓർത്തു നോക്കി . ഒടുവിൽ താൻ ആദിത്യനല്ല ആദിസൂര്യനാണെന്ന സത്യം അവൻ മനസ്സിലാക്കി .

……………………………..

അത് സംഭവിച്ച് ദിവസങ്ങൾ കഴിഞ്ഞ ശേഷം ……

ആദിത്യൻ ഗുഹയ്ക്കുള്ളിൽ ധ്യാനത്തിലായിരുന്ന സമയം . പെട്ടെന്ന് ഓർമ്മയിൽ അന്ന് കണ്ട യുവതിയുടെ രൂപം , വ്യക്തമല്ലാത്ത മുഖമുള്ള ആ യുവതിയുടെ രൂപം വീണ്ടും തെളിഞ്ഞ് വന്നു .