💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

ഏകദേശം ഏഴടിയോളം ഉയരവും അതിനൊത്ത ശരീരവുമുള്ള ഒരാൾ . ഉറച്ച ഉരുക്കു പോലുള്ള പേശികൾ . ഇരുണ്ട നിറം , നീണ്ട് വളർന്ന തലമുടി , ശരീരമാകെ സ്വയം മുറിവേൽപ്പിച്ച പാടുകൾ അതിലൂടെ രക്തം വാർന്നൊഴുകുന്നു . അയാളുടെ കണ്ണുകൾ മുഴുവൻ രക്തവർണ്ണം , മുഖത്ത് ഒരു വന്യജീവിയുടേത് പോലുള്ള ക്രൂരഭാവം . ഒരു കറുത്ത വസ്ത്രം കൊണ്ട് അരയ്ക്ക് താഴേക്ക് അയാൾ ശരീരം മറച്ചിരിക്കുന്നു .

അയാൾ കയിൽ ഇരുന്ന ചാട്ടവാറിലേക്ക് നോക്കി അതിൽ മുഴുവൻ തന്റെ രക്തം പറ്റിപ്പിടിച്ചിരിക്കുന്നു . അത് കണ്ട് അയാളുടെ മുഖത്ത് ആരെയും ഭയപ്പെടുത്തുന്ന ഭയാനകമായ ഒരു പുഞ്ചിരി വന്ന് നിറഞ്ഞു . അതിന് ശേഷം അയാൾ ആ മുള്ളുകൾ പതിപ്പിച്ച ചാട്ടവാറ് ഉപയോഗിച്ച് വീണ്ടും ശരീരത്തിൽ സ്വയം പ്രഹരിക്കാൻ തുടങ്ങി അത് കാരണം ശരീരത്തിൽ വീണ്ടും മുറിവുകൾ ഉണ്ടാകാൻ തുടങ്ങി .

കുറച്ച് സമയം കൂടി അയാൾ ആ പ്രവർത്തി തുടർന്നു , അതിന് ശേഷം ആ ചാട്ടവാറ് ദൂരേക്ക് വലിച്ചെറിഞ്ഞു . നിലത്ത് രണ്ട് ചെമ്പ് പാത്രങ്ങളിൽ നിറച്ച് വച്ചിരുന്ന മനുഷ്യ രക്തത്തിലേക്ക് അയാൾ നോക്കി . അയാൾ അതിൽ ഒരു പാത്രം കയ്യിൽ എടുത്ത് പൊക്കിയ ശേഷം ആ രക്തം മുഴുവൻ തലവഴി ഒഴിച്ചു . അടുത്ത പാത്രം കയ്യിൽ എടുത്ത് അതിലെ മനുഷ്യരക്തം പകുതിയോളം കുടിച്ച ശേഷം ബാക്കിയുള്ളത് മുൻപിലെ വിഗ്രഹത്തിലേക്ക് വലിച്ചെറിഞ്ഞു . ശരീരമാസകലം രക്തത്താൽ കുളിച്ച് നിന്ന അയാളെ കാണാൻ ഒരു രാക്ഷസനെ പോലെ തോന്നി മനുഷ്യ ജന്മം പൂണ്ട രാക്ഷസൻ .

അയാൾ ഇതൊക്കെ ചെയ്യുന്നത് കണ്ട ആ മൂങ്ങ ശബ്ദമുണ്ടാക്കാൻ തുടങ്ങി . അയാൾ അതിന്റെ ശബ്ദം കേട്ടതും ആ മൂങ്ങ ഇരിക്കുന്ന ദിശയിലേക്ക് നോക്കി അതിന് ശേഷം അയാൾ തന്റെ വലത്തെ കൈ നീട്ടി .