……………………………………………

വനത്തിനുള്ളിലെ നദിയുടെ അരികിലുള്ള പാറമുകളിൽ ആദിത്യൻ ദൂരേയ്ക്ക് നോക്കി അങ്ങനെ ഇരുന്നു . ഒരു ചിറകടി ശബ്ദത്തോടെ കഴുകൻ അവന്റെ അടുത്ത് പറന്നിറങ്ങിയ ശേഷം ശബ്ദിക്കാൻ തുടങ്ങി . കഴുകനെ കണ്ടതും ആദിത്യൻ കുറച്ച് ദിവസങ്ങൾ പുറകിലേയ്ക്ക് ചിന്തിച്ചു . കഴുകൻ അന്ന് ആദ്യം തന്നെ ആ ഗുഹയ്ക്കുള്ളിൽ എത്തിച്ച ദിവസം ….

……………………………..

ആ ഇരുമ്പ് പെട്ടി കയ്യിൽ എടുത്ത ശേഷം ആദിത്യൻ അത് തുറന്ന് നോക്കി . അതിനുള്ളിൽ പതക്കമൊക്കെ ഉള്ള ഒരു രുദ്രാക്ഷമാല ഭദ്രമായി വച്ചിരിക്കുന്നതാണ് അവൻ കണ്ടത് . അവൻ ആ രുദ്രാക്ഷ മാല കൈയ്യിൽ എടുത്ത് അൽപ നേരം കൗതുകത്തോടെ നോക്കി . അതിന് ശേഷം അത് കഴുത്തിലേക്ക് ഇട്ടു ഒപ്പം നിലത്ത് വച്ച ആ വാളും കയ്യിൽ എടുത്തു .

പെട്ടെന്ന് രുദ്രാക്ഷ മാലയിലെ പതക്കത്തിൽ ഉറപ്പിച്ച് വച്ചിരിക്കുന്ന സൂര്യകാന്ത കല്ലിൽ നിന്ന് ചുവന്ന പ്രകാശം ഉൽഭവിക്കാൻ തുടങ്ങി . ആദിത്യന്റെ ഉള്ളിൽ അത് കണ്ട് ഭയമാണ് വന്ന് നിറഞ്ഞത് . ആ ചുവന്ന പ്രകാശം ആ വാളിൽ വന്ന് പതിച്ചതും ആ വാളിന്റെ കൈ പിടിയിൽ പതിപ്പിച്ചിരിക്കുന്ന അഞ്ച് രത്നങ്ങളും വ്യത്യസ്തമായ അഞ്ച് നിറങ്ങളിൽ പ്രകാശിക്കാൻ തുടങ്ങി . ആ വ്യത്യസ്ത നിറത്തിലുള്ള പ്രകാശങ്ങൾ ആദിത്യന് ചുറ്റും വലയം ചെയ്യാൻ ആരംഭിച്ചു . പെട്ടെന്ന് അവൻ ബോധമറ്റ് നിലത്തേക്ക് വീണു .

നിലത്തേയ്ക്ക് വീണ ആദിത്യൻ ഒരു സ്വപ്ന ലോകത്തിലേയ്ക്ക് മാറ്റപ്പെട്ടു . ആദ്യം കണ്ടത് ഒരു ഉൽക്ക ഭൂമിയിൽ വന്ന് പതിക്കുന്നതും അതിൽ നിന്ന് ലഭിക്കുന്ന വത്യസ്തങ്ങളായ രത്നങ്ങൾ ഉപയോഗിച്ച് വാളും രുദ്രാക്ഷമാലയും നിർമിക്കുന്നതാണ് , പിന്നീട് അവ ഈ ഗുഹയ്ക്കുള്ളിൽ സ്ഥാപിക്കുന്നതും .