?? അവൾ രാജകുമാരി – 9 ?? [ ചെകുത്താനെ സ്നേഹിച്ച മാലാഖ ] 618

അവന്തികയും തോഴിമാരും ആ ആൽമരചുവട്ടിലേക്ക് നടന്നു . ആ വൃദ്ധ അത് കണ്ട് ഒന്നും മനസ്സിലാകാതെ അങ്ങനെ തന്നെ നിന്നു .

” എന്തിനാണ് ഈയുള്ളവളുടെ അടുത്തേക്ക് വന്നത് . അറിയാതെ ഞാനെന്തെങ്കലും തെറ്റ് ചെയ്തെങ്കിൽ ക്ഷമിക്കണം കുമാരീ …… ”

ആ വൃദ്ധ കൈ കൂപ്പിക്കൊണ്ട് അവന്തികയോട് പറഞ്ഞു .

അത് കേട്ടതും അവൾ ആദ്യം ഒന്നു പുഞ്ചിരിച്ചു .

” കുമാരി നിങ്ങളുടെ അടുത്തേക്ക് വന്നത് തത്തയെ കൊണ്ട് ചീട്ടെടുപ്പിച്ച് ഫലമറിയാനാണ് ….. ”

തോഴി പറഞ്ഞ ആ വാക്കുകൾ കേട്ടതും വിശ്വസിക്കാനാകാതെ ആ വൃദ്ധ ഒരു നിമിഷം അങ്ങനെ തന്നെ നിന്നു . ശേഷം തത്തയുടെ കൂട് എടുത്ത് അരികിൽ വച്ച് , ആ ആൽത്തറയുടെ കരിങ്കൽ കെട്ടിൽ ചീട്ടുകൾ നിരത്തി വച്ചു . എന്നിട്ട് തത്തയുടെ കൂട് തുറന്നു , പക്ഷെ തത്ത പുറത്തിറങ്ങി ചീട്ടെടുക്കാൻ കൂട്ടാക്കിയില്ല . രണ്ട് മൂന്ന് വട്ടം ഇതാവർത്തിച്ചു ….

” കുമാരീ ….. തത്ത ചീട്ടെടുക്കാൻ തയ്യാറാകുന്നില്ല അതിനർത്ഥം ചീട്ടെടുക്കുമ്പോൾ അറിയുന്ന കാര്യങ്ങൾ മറ്റാരും അറിയരുത് എന്നാണ് . കുമാരിയുടെ തോഴിമാരുടെ സാമിപ്യമുള്ളപ്പോൾ തത്ത ചീട്ടെടുക്കില്ല , അതിന്റെ ഫലം അറിയാനും കഴിയില്ല . അതിലുള്ള കാര്യങ്ങൾ മറ്റാരും അറിയാൻ പാടില്ല എന്നാണ് ഇതിനർത്ഥം ….. ”

ആ വൃദ്ധ അവന്തികയോട് പറഞ്ഞു .

അവന്തിക ഒരു നിമിഷം ഒന്നാലോചിച്ച ശേഷം തോഴിമാരോട് കുതിര വണ്ടിയുടെ അടുത്തേയ്ക്ക് പോകുവാൻ പറഞ്ഞു . അവർ അവളുടെ വാക്കുകൾ അതുപോലെ അനുസരിച്ചു ….. തോഴിമാർ അവിടെ നിന്നും മാറിയതും തത്ത കൂടിന്റെ പുറത്ത് ഇറങ്ങി ഒരു ചീട്ട് ചുണ്ടുകൾ കൊണ്ട് കൊത്തിയെടുത്ത് മാറ്റിയിട്ട ശേഷം അത് കൂടിനുള്ളിലേക്ക് കയറിപ്പോയി ….