💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

ആ പൂജാരി അത്രയും പറഞ്ഞ് ഉള്ളിലേക്ക് നടന്നു . അവന്തിക തോഴിമാരോട് കാര്യങ്ങൾ വിശദീകരിച്ച ശേഷം ഉള്ളിലുള്ള കൽമണ്ഡപത്തിനടുത്തേക്ക് നടന്നു .

ആ പൂജാരി അവന്തികയെ കൽമണ്ഡപത്തിന്റെ അടുത്ത് എത്തിച്ച ശേഷം തിരിച്ച് പോയി . അവൾ അവിടെ ഇരുന്ന് കണ്ണുകളടച്ച് പ്രാർത്ഥിക്കാൻ ആരംഭിച്ചു . പക്ഷെ എത്ര ശ്രമിച്ചിട്ടും അവൾക്ക് പ്രാർത്ഥനയിൽ ശ്രദ്ധ ചെലുത്താൻ സാധിച്ചില്ല , കണ്ണുകൾ അടയ്ക്കുമ്പോൾ തെളിഞ്ഞ് വരുന്നത് അന്ന് വനത്തിൽ വച്ച് നടന്ന സംഭവങ്ങളാണ് … അത് അവളെ അസ്വസ്ഥതയാക്കി ….. ഒടുവിൽ അവൾ അവിടെ നിന്ന് എണീറ്റ് കൽമണ്ഡപത്തിൽ നിന്നിറങ്ങി മുന്നിൽ കണ്ട ഒരു ഇടനാഴിയിലൂടെ മുന്നോട്ട് നടന്നു , ഒടുവിൽ അവൾ ക്ഷേത്രത്തിന്റെ പുറകിലുള്ള കവാടത്തിന്റെ അടുത്ത് എത്തിച്ചേർന്നു .

പുറത്തേയ്ക്ക് നോക്കിയതും മഞ്ഞ് മൂടിയ മലനിരകൾ അവളുടെ കാഴ്ചയ്ക്ക് കുളിർമയേകി . വീണ്ടും ആ യുവാവിനെ കാണണം എന്ന അവളുടെ മനസ്സിലെ ആഗ്രഹം കാരണം ‘ മുന്നോട്ട് പോക ‘ എന്ന് അവളുടെ മനസ്സ് മന്ത്രിച്ചു കൊണ്ടിരുന്നു ഒടുവിൽ അവൾ മുന്നോട്ട് നടന്നു , ആ വനത്തിന് ഉള്ളിലേയ്ക്ക് മനസ്സിൽ അൽപം പോലും ഭയമില്ലാതെ ….

അന്ന് ആ കഴുകൻ തിരിച്ചെത്തിച്ച ചെറിയ ഓർമ്മയിൽ അവൾ മുൻപോട്ട് നടന്നു . കുറച്ചധികം ദൂരം മുന്നോട്ട് പോയതും ഒരു വന്യമൃഗത്തിന്റെ മുരൾച്ച അവളുടെ ചെവികളിലെത്തി . ഏതോ സ്വപനത്തിൽ നിന്നെന്ന പോലെ അവൾ ബോധ മനസ്സിലേക്ക് തിരിച്ചു വന്നു . മുൻപിലേക്ക് നോക്കിയതും തന്നെ നോക്കി ദേഷ്യഭാവത്തിൽ നിൽക്കുന്ന ഒരു ചെന്നായയെയാണ് അവൾ കണ്ടത് ….. അവളുടെ ഉള്ളിലെ ധൈര്യം മുഴുവൻ നഷ്ടമായി , ഭയം അവളെ കീഴ്പ്പെടുത്താൻ തുടങ്ങി ……