?? അവൾ രാജകുമാരി – 9 ?? [ ചെകുത്താനെ സ്നേഹിച്ച മാലാഖ ] 618

മുൻപിൽ നിൽക്കുന്ന ഇരയെ കടിച്ച് കീറാനുള്ള ഭാവത്തിൽ ആ ചെന്നായ അവന്തികയുടെ അടുത്തേയ്ക്ക് ഓടി വന്നു . ഉള്ളിലെ ഭയം കാരണം ഒന്നലറി കരയാനോ തിരിഞ്ഞ് ഓടാനോ പോലും കഴിയാതെ അവൾ നിശ്ചലയായിപ്പോയി . ഓടി വന്ന ചെന്നായ തന്റെ നേരെ ഉയർന്ന് ചാടിയതും അവൾ പേടി കാരണം കണ്ണുകൾ ഇറുക്കി അടച്ചു പക്ഷെ നിമിഷങ്ങൾ കഴിഞ്ഞിട്ടും ഒന്നും സംഭവിച്ചില്ല . അവൾ കണ്ണുകൾ തുറന്നപ്പോൾ മുന്നിലെ കാഴ്ച കണ്ട് ഞെട്ടിപ്പോയി ….. തന്നെ അന്ന് ആക്രമിക്കാൻ ശ്രമിച്ച ആ സിംഹം ചെന്നായയുടെ കഴുത്തിൽ പല്ലുകൾ അമർത്തി വച്ചിരിക്കുന്നു . ആ ചെന്നായ ജീവന് വേണ്ടി പിടയുകയാണ് പക്ഷെ ആ സിംഹം ഒന്നു കൂടി പല്ലുകൾ ചെന്നായയുടെ കഴുത്തിൽ അമർത്തി , നിമിഷങ്ങൾക്കകം ആ ചെന്നായ പിടഞ്ഞ് മരിച്ചു .

വായുടെ ഭാഗത്ത് പറ്റിയ രക്തം നാവ് കൊണ്ട് തുടച്ചെടുത്ത് അവന്തികയെ ഒന്ന് നോക്കിയ ശേഷം ആ സിംഹം വനത്തിനുള്ളിലേക്ക് നടന്നകന്നു …..

മുന്നിൽ നടന്ന സംഭവങ്ങൾ ഒക്കെ കണ്ട് പേടിച്ച് അവൾ അങ്ങനെ തന്നെനിന്നു . പക്ഷെ അവൾക്ക് ഒരു സത്യം മനസ്സിലായി ആ സിംഹം തന്നെ ഇനി ഉപദ്രവിക്കില്ല എന്ന് കാരണം അതല്ലേ തന്റെ ജീവൻ രക്ഷിച്ചത് മാത്രമല്ല ഇപ്പോൾ തന്നെ ഉപദ്രവിക്കാൻ ശ്രമിച്ചതുമില്ല.

ചിന്തകളിൽ നിന്ന് ഉണർന്ന അവന്തിക ആ സിംഹം നടന്ന് പോയ ദിശയിലൂടെ മുന്നോട്ട് നടന്നു .

അൽപ ദൂരം മുന്നോട്ട് നടന്നതും പെട്ടെന്ന് ഒരു മരത്തിന്റെ മുകളിൽ നിന്ന് പുറകിലായി എന്തോ നിലത്തേക്ക് ചാടി ഇറങ്ങുന്ന ശബ്ദം കേട്ട് അവൾ തിരിഞ്ഞ് നോക്കി ….. മുന്നിൽ നിൽക്കുന്ന ആളിനെ കണ്ട് അവൾ ആദ്യം ഒന്ന് ഞെട്ടുകയാണ് ചെയ്തത് . കുറച്ച് ദിവസങ്ങളായി സ്വപ്നങ്ങളിലും ചിന്തകളിലും മാത്രം തെളിഞ് വരുന്ന ആ രൂപം ….. അവൾ അവനെ തന്നെ കണ്ണിമ ചിമ്മാതെ നോക്കി നിന്നു …..