?? അവൾ രാജകുമാരി – 9 ?? [ ചെകുത്താനെ സ്നേഹിച്ച മാലാഖ ] 618

ആ വൃദ്ധ കയ്യിൽ ആ ചീട്ടെടുത്ത ശേഷം അൽപ നേരം കണ്ണുകളടച്ച് ഇരുന്നു . അൽപ സമയം കഴിഞ്ഞ് കണ്ണുകൾ തുറന്ന അവർ ആ ചീട്ടിലേക്ക് നോക്കി , അവരുടെ മുഖത്ത് ഒരു പുഞ്ചിരി വന്ന് നിറഞ്ഞു . അവർ ആ ചീട്ടിലെ ചിത്രം എടുത്ത് അവന്തികയ്ക്ക് നേരെ നീട്ടി . അവൾ അത് വാങ്ങി നോക്കി , അതിൽ കൃഷ്ണനും രാധയും ഒരുമിച്ച് നിൽക്കുന്ന ഒരു ചിത്രമായിരുന്നു ഉണ്ടായിരുന്നത് . ആ ചിത്രം കണ്ടതും അവൾ ഒന്ന് പുഞ്ചിരിച്ചു .

” കുമാരീ….. കുമാരിയുടെ മനസ്സിൽ ഒരാൾ സ്ഥാനം പിടിച്ച് കഴിഞ്ഞിരിക്കുന്നു എന്നാണ് ഞാൻ മനസ്സിലാക്കുന്നത് . രാധാ കൃഷ്ണ പ്രണയം പോലെ പവിത്രമായിരിക്കും കുമാരിക്ക് വന്ന് ചേരുന്നത് . ഭഗാവാൻ കൃഷ്ണൻ വിധി കാരണം ജനിച്ച സ്ഥലത്ത് നിന്നും മറ്റൊരിടത്തേയ്ക്ക് മാറ്റപ്പെടേണ്ടതായി വന്നു , അതുപോലൊരു അനുഭവം കുമാരിയുടെ മനസ്സിലുള്ള ആളും അനുഭവിച്ചിട്ടുണ്ട് …… കുമാരിയുടെ മനസ്സിൽ മുഴുവൻ അയാളെ കുറിച്ചുള്ള ചിന്തകളാണ് എന്ന് കുമാരിയുടെ മുഖഭാവത്തിൽ നിന്ന് എനിക്ക് മനസ്സിലാകുന്നുണ്ട് . പക്ഷെ ഭാവി കാര്യങ്ങൾ എനിക്ക് കുമാരിയോട് പറയാൻ കഴിയില്ല കാരണം ഞാൻ പ്രാർത്ഥിക്കുന്ന ശക്തി തന്നെ അതിൽ നിന്ന് എന്നെ പിന്തിരിപ്പിക്കുന്നു . ദയവായി കുമാരി യാത്ര തുടർന്നാലും …… ”

ആ വൃദ്ധ അത്രയും പറഞ്ഞ് തലകുനിച്ച് അവന്തികയെ നമസ്കരിച്ചു .

ആ വൃദ്ധയെ ഒരു നിമിഷം നോക്കിയ ശേഷം ഒരു പുഞ്ചിരിയോടെ അവൾ കുതിര വണ്ടിയുടെ അടുത്തേയ്ക്ക് നടന്നു

മുൻപോട്ട് നടന്നകലുന്ന അവന്തികയെ തന്നെ ആ വൃദ്ധ നോക്കി നിന്നു ….