💞💞 അവൾ രാജകുമാരി – 9 💞💞 [ ചെകുത്താനെ സ്നേഹിച്ച മാലാഖ ] 618

***************************

അവൻ തിരിഞ്ഞ് ആ സിംഹത്തെ നോക്കിയ ശേഷം ആ വാൾ വനത്തിനുള്ളിലേക്ക് ചൂണ്ടി . കണ്ണുകളിൽ ഭയം മാത്രം നിറഞ്ഞ് നിന്ന ആ സിംഹം ഉൾക്കാട്ടിലേക്ക് ഓടി മറഞ്ഞു .

……………………………..

വിറയ്ക്കുന്ന ശരീരവുമായി അവന്തിക ആ കഴുകനെ പിന്തുടർന്നു . ഇപ്പോഴും മരണത്തിൽ നിന്ന് താൻ രക്ഷപ്പെട്ടത് അവൾക്ക് അവിശ്വസനീയമായി തോന്നി . അതിലുപരി അവൾക്ക് അതിശയമായത് ആ സിംഹം ആ യുവാവിന് മുന്നിൽ അനുസരണയുള്ള അടിമയെപ്പോലെ നിന്നതാണ് .

‘ ആരാണയാൾ ? ‘

അവൾ മനസ്സിൽ ചോദിച്ചു .

ആ വനത്തിനുള്ളിലൂടെ അവൾ ആ കഴുകനെ പിന്തുടർന്നു .

കുറേ ദൂരം മുന്നോട്ട് പോയതും ക്ഷേത്രത്തിന്റെ പുറകിലുള്ള ആ കവാടം അവൾ കണ്ടു . ആ കവാടത്തിന്റെ പുറത്ത് നിലത്തായി ആ കഴുകൻ പറന്നിറങ്ങി . അവളുടെ മുഖത്തും ആ കവാടത്തിനകത്തേയ്ക്കും നോക്കി ആ കഴുകൻ ശബ്ദമുണ്ടാക്കിയ ശേഷം അത് വനത്തിനുള്ളിലേക്ക് പറന്നകന്നു . അവൾ അതെല്ലാം ഒരു അൽഭുതം പോലെ നോക്കി നിന്നു .

‘ ആ യുവാവിന്റെ ആജ്ഞ വന്യമൃഗങ്ങളൊക്കെ അനുസരിക്കുന്നു . വനത്തിനുള്ളിൽ ആര് പ്രവേശിച്ചാലും വന്യമൃഗങ്ങൾക്ക് ആഹാരമാകുമെന്ന് പലതവണ കേട്ടിട്ടുണ്ട് ഇന്ന് താൻ അത് അനുഭവിച്ചറിയുമായിരുന്നു , പക്ഷെ ആ യുവാവ് ആരാണ് …. അയാളെ ആ വന്യമൃഗങ്ങൾ ഒന്നും ചെയ്യുന്നില്ല പകരം ഭയത്തോടെ പറയുന്നതെല്ലാം അനുസരിക്കുന്നു . ആരാണയാൾ ? ‘