?? അവൾ രാജകുമാരി – 9 ?? [ ചെകുത്താനെ സ്നേഹിച്ച മാലാഖ ] 618

……………………………..

മരത്തിന്റെ ഒരു കൊമ്പിൽ ഇരുന്ന ആദിത്യൻ നിലത്തേയ്ക്ക് ചാടി ഇറങ്ങിയ ശേഷം മുഖത്തു കൂടി കിടന്ന തല മുടി കൈവിരലുകൾ കൊണ്ട് പുറകിലേക്ക് വകഞ്ഞ് മാറ്റി …… അവൻ കാണുന്നത് തന്നെ നോക്കി നിൽക്കുന്ന സുന്ദരിയായ ആ യുവതിയെയാണ്.

” നീ എന്തിന് വീണ്ടും ഇവിടേയ്ക്ക് വന്നു ? ആദ്യം വഴിതെറ്റി വന്നതാണെങ്കിൽ ഇപ്പോൾ മനപൂർവ്വമാണ് നീ ഇവിടെ എത്തിച്ചേർന്നത് . എന്താണ് നിന്റെ ഉദ്ദേശം ……? ”

ആദിത്യൻ ഉറച്ച ശബ്ദത്തിൽ അവന്തികയോട് ചോദിച്ചു. അവന്റെ ചോദ്യമാണ് അവളെ സ്വബോധത്തിലെത്തിച്ചത് …

” അത് ….. ആദ്യം നിങ്ങൾ ആരാണ് എന്ന് പറയൂ …? നിങ്ങൾ എന്തിനാണ് ഈ വനത്തിൽ കഴിയുന്നത് . ഈ വനത്തിൽ മനുഷ്യരായ ആര് പ്രവേശിച്ചാലും വന്യമൃഗങ്ങളാൽ മരണം ഉറപ്പാണ് . പക്ഷെ വന്യമൃഗങ്ങൾ നിങ്ങളുടെ ആജ്ഞ അനുസരിക്കുന്നു . സത്യത്തിൽ നിങ്ങൾ ആരാണ് …. ?”

അവന്തിക തന്റെ മനസ്സിലെ ചോദ്യങ്ങൾ മുഴുവൻ ആദിത്യനോട് ചോദിച്ചു . അത്രയും നേരം ഒരു പുഞ്ചിരിച്ച മുഖവുമായി നിന്ന ആദിത്യന്റെ മുഖത്ത് മുഴുവൻ പെട്ടെന്ന് ദേഷ്യം വന്ന് നിറഞ്ഞു ……

” മടങ്ങിപ്പോക….. ഇനി ഇവിടേയ്ക്ക് വരരുത് ….. ”

ആദിത്യൻ അത്രയും പറഞ്ഞ് അവന്തികയുടെ ഒരു ചോദ്യത്തിനും ഉത്തരം പറയാതെ മുന്നോട്ട് നടന്നു .

” നിങ്ങൾ സൂര്യവംശജനാണെന്നും നിങ്ങളുടെ കയ്യിലുള്ളത് വിശേഷപ്പെട്ട സൂര്യ അസ്ത്ര എന്ന വാളാണെന്നുമുള്ള കാര്യം എനിക്ക് ഉറപ്പാണ് … ”