💞 അവൾ രാജകുമാരി – 9💞
Aval Raajakumaari Part – 9 | Author : 👼 VICHU[ ചെകുത്താനെ സ്നേഹിച്ച മാലാഖ ] 👼  Previous Part

View post on imgur.com

അവൻ മുന്നോട്ട് നടന്ന് ആ വാളിന്റെ അടുത്ത് എത്തി . നിലത്ത് ഉറച്ച് നിന്ന ആ വാൾ മണ്ണിൽ നിന്ന് വലിച്ചൂരി എടുത്തു . അപ്പോഴും ആ സിംഹം ഭയത്തോടെ നിലത്ത് തന്നെ കിടക്കുകയായിരുന്നു . അവന്തിക ഇതെല്ലം നോക്കി നിന്നു മനസ്സിലെ പേടിയോടെ . ആദിത്യൻ മുകളിലേക്ക് ഇടത്തെ കൈ ഉയർത്തിയതും ആ കഴുകൻ പറന്ന് അവന്റെ കയ്യിൽ വന്നിരുന്നു .

” മ് വനത്തിന് പുറത്തേക്ക് വഴി കാട്ടി കൊടുക്കൂ….”

ആദിത്യൻ ആ കഴുകനോട് ആജ്ഞാപിച്ചു . അത് ക്ലീ….. ക്ലീ….. എന്ന് അവന്തികയുടെ മുന്നിൽ പോയി നിലത്ത് ഇരുന്ന് ശബ്ദിച്ച ശേഷം മുന്നോട്ട് പറന്നു . അവൾ അവനെ ഒരു നിമിഷം ആ ഭയം നിറഞ്ഞ മുഖത്തോടെ നോക്കി .

” പേടിക്കണ്ട പോയ്ക്കോളു . അത് യഥാസ്ഥാനത്ത് നിങ്ങളെ എത്തിക്കും …. ”

അവൻ ഒരു പുഞ്ചിരിയോടെ അത് പറഞ്ഞതും അവൾ തിരിഞ്ഞ് ആ കഴുകന് പിന്നാലെ നടന്നു . മറുപടിയായി ഒന്നും പറയാൻ അവളുടെ ശബ്ദം പുറത്തേയ്ക്ക് വന്നില്ല . മുന്നിൽ കണ്ട മരണഭയം അവളെ പൂർണ്ണമായി കീഴ്പ്പെടുത്തിയിരുന്നു . അൽപം മുന്നോട്ട് നടന്ന് പോയ അവൾ തിരിഞ്ഞ് നോക്കി . ആ നോട്ടം ചെന്നെത്തിയത് ആദിത്യന്റെ മുഖത്തായിരുന്നു . അവളുടെ ആ നോട്ടം അവനെയും ഏതോ ഒരു മാന്ത്രിക ലോകത്തേയ്ക്ക് കൂട്ടിക്കൊണ്ട് പോയി . ആദിത്യനെ തിരിഞ്ഞ് നോക്കിയ ശേഷം അവന്തിക തിരിഞ്ഞ് മുന്നോട്ട് നടന്നു ഉള്ളിൽ മിന്നിമറഞ്ഞ ഒരു സന്തോഷവുമായി ……