✮കൽക്കി࿐ (ഭാഗം – 2) വിച്ചു [ ചെകുത്താനെ സ്നേഹിച്ച മാലാഖ ] 1163

യാത്രയിലുടനീളം രഘുറാം ആകെ ടെൻഷനിലായിരുന്നു ……

അന്വേഷിച്ച എല്ലാ കേസുകളിലും വിജയം നേടി എന്ന സർവ്വീസ് ഹിസ്റ്ററി പരിഗണിച്ചാണ് ഈ കേസ് തന്നെ തേടി വന്നത് , പക്ഷെ ഇപ്പൊ എന്ത് ചെയ്യണം എന്നറിയാത്ത അവസ്ഥ . മേലുദ്യോഗസ്ഥരുടെ ചോദ്യങ്ങൾക്ക് എന്ത് മറുപടി പറയണം എന്നറിയാതെ അയാൾ കുഴഞ്ഞു …… എല്ലാ കേസുകളും പുഷ്പം പോലെ തെളിയിച്ച തനിക്ക് ഈ കേസ്സ് മാത്രം പിടിതരാതെ നിൽക്കുന്നു ….

കാറിന്റെ സീറ്റിൽ ചാരി കിടന്ന് അയാൾ പലതും ആലോചിച്ചു കൊണ്ടേയിരുന്നു …..

ഒടുവിൽ ആ ഇന്നോവ കാർ മന്ത്രിയുടെ ഗസ്റ്റ് ഹൗസിന് മുന്നിലായി ചെന്ന് നിന്നു , പതിയെ രഘുറാം പുറത്തേയ്ക്കിറങ്ങി ….. പാർക്കിങ്ങിൽ തന്നെ DGP ഉൾപ്പടെ തന്റെ മേലുദ്യോഗസ്ഥരുടെ കാറുകൾ കിടക്കുന്നതാണ് അയാൾ കണ്ടത് . ഒരു ദീർഘ നിശ്വാസം വിട്ട ശേഷം അയാൾ അകത്തേയ്ക്ക് കയറി …..

ഉള്ളിലെ ഓഫീസിനുള്ളിൽ തന്നെ ഹോം മിനിസ്റ്ററും DGP യും മറ്റ് ഉദ്യോഗസ്ഥരും ഉണ്ടായിരുന്നു .

അനുവാദം ചോദിച്ച് അകത്ത് കയറിയ ഉടനെ അയാൾ സീനിയർ ഓഫീസിനേഴ്സിന് സല്യൂട്ട് നൽകി ….

” രഘുറാം …… അറിഞ്ഞോ കാര്യങ്ങളൊക്കെ അവന്റെ കൈ കൊണ്ട് പിന്നേം മൂന്ന് പേർ കൂടി തീർന്നു ….. ”

ഒരു പുശ്ച ഭാവത്തോട മന്ത്രി പറഞ്ഞു , അത് കേട്ട് തലകുനിച്ച് നിൽക്കാനെ രഘുറാമിന് കഴിഞ്ഞുള്ളൂ ……