✮കൽക്കി࿐ (ഭാഗം – 2) വിച്ചു [ ചെകുത്താനെ സ്നേഹിച്ച മാലാഖ ] 1163

സ്ഥിരമായി ഒരു ഓട്ടോ സ്റ്റാന്റൊന്നുമില്ല അവന് , അലഞ്ഞ് തിരിഞ്ഞുള്ള ഓട്ടമാ . അതുകൊണ്ട് എവിടെ നിന്നാണ് അവൻ ഇവിടേയ്ക്ക് എത്തിയതെന്ന് അറിയില്ല , പിന്നെ അടുത്തുള്ള പെട്രോൾ പമ്പിൽ ഇന്നലെ രാത്രി ഒരു പതിനൊന്നരയ്ക്ക് ശേഷം ഡീസൽ അടിക്കാൻ കയറിയിരുന്നു , ആ പെട്രോൾ പമ്പിൽ നിന്ന പയ്യനോട് ഞാൻ ചോദിച്ചു പക്ഷെ ഓട്ടോയിൽ വേറെ ഒരാളുണ്ടായിരുന്നോ എന്ന് അവന് ഓർമ്മയില്ല എന്നാ പറയുന്നെ , അവിടുത്തെ CCTV വർക്കിങ്ങുമല്ല .

എനിക്ക് തോന്നുന്നത് മുൻപ് ഓട്ടോയിൽ കൊഴിഞ്ഞ് കിടന്ന മുടി കാറ്റത്തോ മറ്റോ പറന്ന് പുറത്തേയ്ക്ക് വീണതാകാം എന്നാ ….. അങ്ങനെ ഒരു സ്ത്രീ ഇവിടെ ഉണ്ടായിരുന്നേൽ ഉറപ്പായും ആ കില്ലർ അവരെയും കൊല്ലുമായിരുന്നു …. ”

ജയരാജ് പറഞ്ഞ മറുപടി കേട്ടുകൊണ്ട് രഘുറാം അവിടെ മുഴുവൻ ഒന്നുകൂടി ചുറ്റി നടന്നു , ഒടുവിൽ ആ ഓട്ടോയുടെ മുന്നിലായി ചെന്ന് നിന്ന ശേഷം ആ പൊട്ടിയ ഗ്ലാസ്സിലേയ്ക്ക് തന്നെ സൂക്ഷിച്ച് നോക്കി …..

” സർ അവർ പറഞ്ഞത് ഇത് ഏറു നക്ഷത്രം അതിന്റെ പേര് ആ …. ഷൂറികെൻ അത് തറച്ച് നിന്നതാകാനാണ് സാധ്യത എന്നാണ് . ഗ്ലാസ്സിൽ നിന്ന് ബ്ലഡ് സാംപിൾസും കിട്ടിയിട്ടുണ്ട് …. ഇതിൽ ലിജോയുടെ കൈപ്പത്തി മുറിഞ്ഞിട്ടുണ്ട് അവന്റെ ബ്ലഡ് ആകാനാണ് സാധ്യത …. ”

ജയരാജ് പറഞ്ഞു ….

” മരണകാരണം ? ”

രഘുറാം ഉറപ്പിക്കാനായി ഒന്ന് കൂടി ചോദിച്ചു …