മാന്ത്രികലോകം 8 [Cyril] 2320

ഞാൻ ആ വീടിനെ പരിശോധിച്ചു… നാല് മാന്ത്രികരും പതിനാറ്‌ സാധാരണ മനുഷ്യരും ആ വീട്ടില്‍ ഉണ്ടായിരുന്നു…. മനുഷ്യര്‍ എല്ലാവരും ആ മാന്ത്രികരുടെ നിയന്ത്രണത്തിൽ ആയിരുന്നു.

നാല് മാന്ത്രികരും ആരെയോ ആക്രമിക്കാൻ തയാറായി നില്‍ക്കുന്നതാണ് ഞാൻ കണ്ടത്…

“ശത്രുക്കളിൽ ആരുടെയോ ശക്തി നമ്മുടെ ഈ താവളത്തില്‍ പ്രവേശിക്കാന്‍ ശ്രമിച്ചത്‌ കൊണ്ടാണ് “മൃതിമഞ്ഞ്” പ്രതികരിച്ചത്… എന്തായാലും നുഴഞ്ഞു കയറാൻ ശ്രമിച്ച ആ ശക്തിയെ മൃതിമഞ്ഞ് നശിപ്പിച്ചു എന്നതിൽ സംശയമില്ല…” ഒരു മാന്ത്രികന്‍ ഉറക്കെ ചിരിച്ചുകൊണ്ട് പറഞ്ഞു.

“അത് ആരായാലും ആ മാന്ത്രികന്റെ മരണം മറ്റുള്ളവര്‍ക്ക് ഒരു പാഠമാകട്ടെ…” മറ്റൊരുത്തന്‍ ക്രൂരമായി ചിരിച്ചു.

അതുകേട്ട് ഞാനും മെല്ലെ ചിരിച്ചു.

പക്ഷേ പെട്ടന്ന് എന്റെ ചിരി മാഞ്ഞു…

കാരണം ഈ മാന്ത്രികരെ കുറിച്ച് ഇപ്പോഴാണ് എനിക്ക് മനസ്സിലായത്…

അവരില്‍ എന്തോ പ്രത്യേകത ഉള്ളത് പോലെ നേരത്തെ എനിക്ക് തോന്നിയതിന്‍റെ കാരണവും എനിക്ക് മനസിലായി.

പിന്നേ മറ്റെ രണ്ട് മാന്ത്രികരുടെ ലക്ഷ്യം ഈ താവളം തന്നെയാണെന്നും ഞാൻ മനസ്സിലാക്കി…

അവർ ആ മനുഷ്യരെ ഇവിടെ കൊണ്ടുവന്നതിന്‌ ശേഷം ഇവര്‍ എല്ലാവരും ഒരുമിച്ച് മലാഹിയുടെ താവളത്തില്‍ പോകും എന്ന കാര്യം തീര്‍ച്ചയായി.

ആ വീടിനെ ഞാൻ എന്റെ ശക്തി ഉപയോഗിച്ച് പരിശോധിച്ചു… മാന്ത്രികപരമായി എന്തോ സൃഷ്ടിച്ചതിന്‍റെ അവശേഷിച്ച ഊര്‍ജ്ജം അവിടെ തങ്ങി നിന്നത് എന്റെ ആത്മ ശക്തിക്ക് അനുഭവപ്പെട്ടു… അതെന്താണെന്ന് എനിക്ക് പെട്ടന്ന് മനസ്സിലാവുകയും ചെയ്തു…

മലാഹിയുടെ മാന്ത്രികർ അവരുടെ ശക്തി ഉപയോഗിച്ച് ആ വീട്ടില്‍ മാന്ത്രിക കവാടം നേരത്തേയും സൃഷ്ടിച്ചിട്ടുണ്ടായിരുന്നു. അതിന്റെ അവശേഷിച്ച ഊര്‍ജ്ജം ആയിരുന്നു അത്…

പക്ഷേ ഇപ്പോൾ അവിടെ മാന്ത്രിക കവാടമൊന്നും എനിക്ക് കാണാന്‍ കഴിഞ്ഞില്ല….

അദൃശ്യമായ മാന്ത്രിക കവാടം വല്ലതുമുണ്ടോ എന്നും ഞാൻ സൂക്ഷ്മമായി പരിശോധിച്ചു — പക്ഷേ ഇല്ലായിരുന്നു.

എന്തായാലും വര്‍ഷങ്ങളായി ഈ വീടിനെ മലാഹിയുടെ മാന്ത്രികർ ഉപയോഗിക്കുന്നു എന്ന കാര്യവും എനിക്ക് ബോധ്യപ്പെട്ടു… ഇനിയും ഇതുപോലെ എത്ര വീടുകളാണ് മലാഹിയുടെ നിയന്ത്രണത്തിൽ ഉള്ളതെന്ന് കണ്ടുപിടിക്കണം…

പക്ഷേ ആദ്യം ഇവിടെയുള്ള ഇവരുടെ കാര്യത്തിന് ഒരു തീരുമാനം ഉണ്ടാക്കണം.

ഈ മനുഷ്യരെ കൊണ്ടുപോയി മലാഹിയുടെ മാന്ത്രികർ അവരുടെ മറുപ്രതി സൃഷ്ടിക്കും എന്നറിയാം.. പക്ഷേ അവരെ എങ്ങോട്ട് കൊണ്ടുപോകാനാണ് മാന്ത്രികർ നിശ്ചയിച്ചിരിക്കുന്നത്…? അതായിരുന്നു എന്റെ അടുത്ത ചോദ്യം.

ഏതു ലോകത്താണ് ഇവരുടെ പ്രധാന താവളം..?