? ദിയ – 1 ? [ ചെകുത്താനെ സ്നേഹിച്ച മാലാഖ ] 720

” അപ്പൊ നിന്റെ അനുജത്തിയോ …..? ”

നിലത്തിരുന്ന അവനെ വലിച്ചെണീപ്പിച്ച ശേഷം ഞാൻ ചോദിച്ചു . അവൻ എണീറ്റ് ബാക്കിയിരിക്കുന്ന മദ്യകുപ്പിയും കയ്യിലെടുത്ത ശേഷം ഞങ്ങൾ പുഴക്കരയിലൂടെ മുന്നോട്ട് നടന്നു …

” അവള് വീട്ടിലുണ്ട് …. ”

എന്റെ തോളിലൂടെ കയ്യും ഇട്ട് നടക്കുന്ന അനൂപ് പറഞ്ഞു …

” എടാ അവളെ ഒറ്റയ്ക്ക് വീട്ടിലാക്കിയിട്ടാണോ നീ ഈ പേകൂത്തിന് എന്നെയും വിളിച്ചോണ്ട് ഈ രാത്രി ഇങ്ങോട്ട് വന്നത് …. ”

ഞാൻ അവനോട് അൽപ്പം ദേഷ്യത്തോടെ ചോദിച്ചു .

” അതിനെന്താ … എടാ അവള് പെണ്ണാണെങ്കിലും ആണിന്റെ ചങ്കൂറ്റമാ … നിന്നോട് പ്രത്യേകം പറയണ്ടല്ലോ …. ഇന്നലെ തന്നെ കോളേജിലെ ഏതോ ഒരുത്തന്റെ കരണം പുകയ്ച്ചിട്ടാ വീട്ടിലെത്തിയത് …. അവളോട് കളിച്ചാലേ വിവരമറിയും … ”

അവൻ ഒരു പുഞ്ചിരിയോടെ പറഞ്ഞു …

” അതങ്ങനെയല്ലേ വരൂ …. ഞാനല്ലേ അവളുടെ ഗുരു ….. ”

ഞാൻ അഭിമാനത്തോടെ പറഞ്ഞു . കാരണം പഠിക്കുന്ന സമയത്തേ കളരി അഭ്യാസമുറകൾ പഠിച്ച ഞാനാണ് പിന്നീട് അനൂപിന്റെ അനുജത്തി അനുപമയ്ക്ക് ചില മുറകളും അഭ്യാസ വിദ്യകളും പറഞ്ഞ് കൊടുത്തത് ഒരു സെൽഫ് പ്രൊട്ടക്ഷന് വേണ്ടി . അനുപമ അനൂപിന്റെ മാത്രമല്ല എന്റെ കൂടി കുഞ്ഞനുജത്തിയാണ് , ഇപ്പോൾ ഡിഗ്രി സെക്കന്റിയറാണ് കക്ഷി .