✮കൽക്കി࿐ (ഭാഗം – 19 ) വിച്ചു [ചെകുത്താനെ സ്നേഹിച്ച മാലാഖ ] 1099

                    ……………………..

അന്ന് രാത്രിയോടെ ……
രുദ്രന്റെ വീട്

റൂമിൽ പലതും ചിന്തിച്ചിരിക്കുകയായിരുന്നു ആദി , മുഖത്ത് ഇപ്പോഴും സങ്കടം തളം കെട്ടി കിടക്കുന്ന അവസ്ഥ തന്നെ …. അവളെ മറക്കണം ഓർക്കരുത് എന്ന് മനസ്സിനെ എത്ര പറഞ്ഞ് പഠിപ്പിച്ചാലും അതിന്റെ പതിന്മടങ്ങായി അവളെ കുറിച്ചുള്ള ചിന്തകൾ മനസ്സിൽ വന്നു നിറയുന്ന അവസ്ഥ . ഒരു തരം വീർപ്പ് മുട്ടലോടെ അവൻ ഉറക്കം വരാതെ റൂമിൽ തലങ്ങും വിലങ്ങും നടന്നു .

അപ്പോഴാണ് കയ്യിൽ ധരിച്ചിരുന്ന ആ രുദ്രാക്ഷ മാല റ്റേബിളിന് പുറത്ത് ഊരി വച്ചത് മറന്നിരുന്ന കാര്യം അവൻ കണ്ടത് . അത് കയ്യിലെടുത്ത് നോക്കിയതും ഉള്ളിൽ എന്തോ വല്ലാത്ത ആശ്വാസം വന്ന് നിറയുന്നത് പോലെ . മനസ്സിൽ പെട്ടെന്ന് എന്തോ തോന്നിയതും അവൻ വേഗം ഡ്രൈസ് മാറിയ ശേഷം റൂം ലോക്ക് ചെയ്ത് പുറത്തേക്കിറങ്ങി ….. മുന്നോട്ട് നടന്ന് താഴേക്കുള്ള സ്റ്റെപ്പിറങ്ങാൻ തുടങ്ങിയപ്പോഴേക്കും പെട്ടെന്ന് രുദ്രൻ റൂം തുറന്ന് പുറത്തേക്കിറങ്ങി വന്നു ….

” എങ്ങോട്ടാടാ ഈ രാത്രി ? ”

രുദ്രൻ പുറകിൽ നിന്ന് വിളിച്ച് ചോദിച്ചു … അത് കേട്ടതും അവനവിടെ നിന്നു ….

” എന്താടാ ? എങ്ങോട്ടാ ? ”

മറുപടിയൊന്നും പറയാതെ നിൽക്കുന്ന ആദിയെ കണ്ടതും രുദ്രൻ അവന്റെ അടുത്ത് എത്തി തോളിൽ കൈ വച്ചുകൊണ്ട് ചോദിച്ചു .

” എനിക്കിവിടെ എന്തൊക്കെയോ ചെയ്ത് തീർക്കാനുണ്ടന്നല്ലേ ആന്റണിച്ചായൻ പറഞ്ഞത് , അത് എന്തെന്ന് ഞാൻ തന്നെ കണ്ട് പിടിക്കുകയും വേണം …. ഇവിടെ ഈ വീടിനുള്ളിലിരുന്നാൽ ഒരു വഴിയും തുറക്കാൻ പോകുന്നില്ല അതിന് അന്വേഷിച്ചിറങ്ങുക തന്നെ വേണം . ”

ആദി ഉടനെ മറുപടി പറഞ്ഞു …