✮കൽക്കി࿐ (ഭാഗം – 19 ) വിച്ചു [ചെകുത്താനെ സ്നേഹിച്ച മാലാഖ ] 1103

‘ ഇന്നലെ രാത്രി ഭയന്ന് വിറങ്ങലിച്ച് നിന്നപ്പോഴും ഒടുവിൽ എന്റെ നെഞ്ചിൽ തലചായ്ച്ച്
പൊട്ടിക്കരഞ്ഞപ്പോഴും എന്നോട് സംസാരച്ചപ്പോഴും ബൈക്കിൽ ഒരുമിച്ച് യാത്ര ചെയ്തപ്പോഴുമെല്ലാം ഞാൻ അനുഭവിച്ചതറിഞ്ഞതാണ് അവൾക്ക് എന്നോടുള്ള തുറന്ന് പറയാത്ത ആ ഇഷ്ടം . അവളുടെ കണ്ണുകളിലും ആ ചിരിയിലും ഞാൻ നേരിട്ട് കണ്ടതാണ് മനസ്സിലാക്കിയതാണ് ആ പ്രണയം ….

പക്ഷെ ഇപ്പോൾ അവൾ ഇങ്ങനെ പറയുമ്പോൾ എല്ലാം എന്റെ വെറും തോന്നലായിരുന്നോ എന്ന് സംശയിക്കുകയാ , തെറ്റ് പറ്റിയോ എന്ന് തോന്നിപ്പോവുകയാ …. ഇനി അവൾ നുണ പറയുകയാണോ , പക്ഷെ എന്തിന് , അങ്ങനെയായിരിക്കണേ എന്ന് മനസ്സ് കൊതിക്കുവാ ….

പക്ഷെ സത്യം അത് ഇന്നവൾ പറഞ്ഞത് തന്നെയാ . അത് പറയുമ്പോൾ അവളുടെ ശബ്ദം ഇടറിയില്ല , മിഴി ചിമ്മിയില്ല , നോട്ടം പതറിയില്ല . അവൾ പറഞ്ഞത് ശരിയാണ് , ജസ്റ്റ് ഫ്രണ്ട്സ് . അവൾ അങ്ങനയെ കണ്ടിട്ടുള്ളൂ ഞാനാ ഏറെ ആഗ്രഹിച്ചത് , വെറുതെ പലതും ചിന്തിച്ച് കൂട്ടിയത് . ‘

നിലത്തേയ്ക്ക് നോക്കി അവൻ ഓരോന്ന് ഓർത്തു . അപ്പോഴേക്കും ഡോറ് തുറന്ന് രുദ്രൻ അകത്തേയ്ക്ക് കയറി വന്നു …

” നീ ഈ രാത്രി എവിടെപ്പോയതാ ടാ … നിന്റെ ബൈക്കിന്റെ ശബ്ദം കേട്ടാ ഞാൻ ഉണർന്നത് … എന്താടാ ? എന്താ നീ കരയുവാണോ …? ”

രുദ്രനതും പറഞ്ഞ് മുന്നോട്ട് വന്നതും ആദി എണീറ്റ് അവനെ കെട്ടിപ്പിടിച്ച ശേഷം പൊട്ടിക്കരയാൻ തുടങ്ങി …. അവൻ ഉള്ളിൽ പിടിച്ച് നിർത്തിയ സങ്കടം ഒരു മഴയായി പെയ്തിറങ്ങുകയായിരുന്നു അപ്പോൾ .