✮കൽക്കി࿐ (ഭാഗം – 19 ) വിച്ചു [ചെകുത്താനെ സ്നേഹിച്ച മാലാഖ ] 1103

മനസ്സിൽ പലതും ചിന്തിച്ചു കൊണ്ട് മുന്നോട്ട് പോകുന്നതിനിടയിൽ പെട്ടെന്ന് അവന്റെ കൈകാലുകൾ ബ്രേക്കിലമർന്നു …. മുന്നോട്ട് പോകുന്ന റോഡ് രണ്ടായി തിരിയുന്നു , മുന്നിലായി രണ്ട് വഴികൾ ഒന്ന് യഥാർത്ഥ വൈകുണ്ഡ പുരിയിലേക്കും മറ്റൊന്ന് കാലഭൈരവൻ ക്ഷേത്രത്തിലേയ്ക്കും . രണ്ടാമതൊന്ന് ചിന്തിക്കാതെ അവൻ കാലഭൈരവൻ ക്ഷേത്രത്തിലേക്കുള്ള വഴിയിലേക്ക് ബൈക്ക് തിരിച്ച് വേഗത കൂട്ടി ….

കുറച്ച് സമയത്തെ യാത്രയ്ക്കൊടുവിലവൻ കാലഭൈരവൻ ക്ഷേത്രത്തിനടുത്തായി എത്തി … ബൈക്ക് ഒരിടത്ത് വച്ച ശേഷം അവൻ വേഗം പടികൾ ഓടിക്കയറി മുകളിലെത്തി . ആൽമരത്തിന് സമീപത്തുകൂടി കൽമണ്ഡപവും കഴിഞ്ഞ് അവൻ നേരെ ചെന്നത് ആ ക്ഷേത്രത്തിലെ പ്രധാന ശിവലിംഗ പ്രതിഷ്ഠയ്ക്ക് മുന്നിലേക്കായിരുന്നു . രാത്രി ഇത്രയും സമയമായിട്ടും നട തുറന്ന് കിടക്കുകയാണ് . അവൻ സംശയത്തോടെ ചുറ്റിലും നോക്കി , അനാഥർ വഴിയാത്രക്കാർ അങ്ങനെ പലർ ക്ഷേത്രത്തിന്റെ പല ഭാഗത്തായി കിടന്നുറങ്ങുന്നുണ്ട് , അപ്പോഴാണവൻ കണ്ടത് തൊട്ട് പുറകിലായി ഒരു വൃദ്ധയായ സ്ത്രീ തന്നെ നോക്കി കൽമണ്ഡപത്തിലിരിക്കുകയാണ് …

” നട അടയ്ക്കാറില്ല കുഞ്ഞേ എപ്പോഴും തുറന്ന് തന്നെ കിടക്കും , പണ്ട് മുതലേ അങ്ങനെയാ . എന്ത് ആവശ്യമുണ്ടെങ്കിലും പ്രയാസമുണ്ടെങ്കിലും മനസ്സുരുകി വിളിച്ചാൽ മതി ആ കാലഭൈരവൻ മറുപടി തരും ….. വളർത്താനായാലും വധിക്കാനായാലും അവനുണ്ടാകും കൂടെ , ഈ സംഹാര രുദ്രൻ …. ”

ആ മുത്തശ്ശി ഒരു പുഞ്ചിരിയോടെ പറഞ്ഞ ശേഷം തന്റെ കയ്യിലിരുന്ന കീറിയ പുതപ്പും മൂടിക്കൊണ്ട് അവർ പതിയെ അവിടെ കിടന്ന് കണ്ണുകളടച്ചു ഒന്ന് മയങ്ങാൻ വേണ്ടി …