✮കൽക്കി࿐ (ഭാഗം – 19 ) വിച്ചു [ചെകുത്താനെ സ്നേഹിച്ച മാലാഖ ] 1103

” എന്താ ? ”

അവൾ സംശയത്തോടെ ചോദിച്ചു ..

” അത് ….. തന്റെ ഫോൺ നമ്പർ ഒന്ന് തരാമോ ? ”

” എന്തിന് ? ”

” അല്ല അതാവുമ്പോൾ ഫോൺ വിളിച്ചാൽ മതിയല്ലോ ഇടയ്ക്കിടയ്ക്ക് ഇങ്ങനെ മതില് ചാടണ്ടല്ലോ …. ”

അവൻ ഒരു പുഞ്ചിരിയോടെ പറഞ്ഞു ….

” അല്ല …. അത് വേണ്ട . അതിന് …. അതിന് ചേട്ടൻ എന്റെ ആരാ …. ? അന്ന് ഞാൻ ചേട്ടനെ തിരഞ്ഞതിന് ഒരു കാരണമുണ്ടായിരുന്നു , അത് ഞാൻ മറന്നു . ചേട്ടൻ ചെയ്തതിന് ഒരു നല്ല വശം ഉള്ളതു കൊണ്ട് മാത്രമാ ഞാൻ അറിഞ്ഞ കാര്യങ്ങൾ ഒന്നും പുറത്ത് പറയാത്തത് .

രണ്ട് തവണ ചേട്ടൻ എന്റെ ജീവൻ രക്ഷിച്ചു ശരി തന്നെ , അതിന്റെ കടപ്പാടും നന്ദിയും എനിക്കുണ്ട് പക്ഷെ നമ്മൾ തമ്മിൽ കണ്ട് പരിചയമല്ലാതെ മറ്റ് ബന്ധമൊന്നുമില്ലല്ലോ , ഇന്നിപ്പൊ ഇവിടെ ഈ സമയത്ത് വന്നിട്ടും ഞാനൊന്നും പറയാത്തത് ആ കടപ്പാട് മാനിച്ച് മാത്രമാ …. അങ്ങനെ ഒരാൾക്ക് ഞാനെന്തിനാ എന്റെ ഫോൺ നമ്പർ തരുന്നേ , അങ്ങനെ ഫോണിൽ സംസരിക്കാനും മാത്രം നമ്മൾ തമ്മിൽ ഒന്നുമില്ലല്ലോ …. ജസ്റ്റ് ഫ്രണ്ട്സ് അത്രയല്ലേ ഉള്ളൂ , പക്ഷെ ആ പേരിൽ സമയം കളയാൻ എനിക്ക് പറ്റില്ല ചേട്ടാ … ഞാനിപ്പൊ ഒരു എക്സാമിന് പ്രിപ്പയർ ചെയ്യുവാ പിന്നെ അല്ലാതെയുള്ള ചില പഠനങ്ങളും അതിനിടയിൽ ഈ ഫോൺ വിളിയൊന്നും ശരിയാവില്ല …..

പിന്നെ …. ചേട്ടന്റെ പോക്ക് എങ്ങോട്ടാണെന്ന് എനിക്ക് മനസ്സിലായി അത് വേണ്ട . ഒരു പെണ്ണ് ചില സന്ദർഭങ്ങളിൽ അടുത്ത് ഇടപഴകി എന്ന് വച്ച് എല്ലാം ആ അർത്ഥത്തിൽ എടുക്കരുത് . എല്ലാവർക്കും എല്ലാവരോടും അങ്ങനെ ഇഷ്ടം തോന്നണമെന്നില്ല . ”