✮കൽക്കി࿐ (ഭാഗം – 19 ) വിച്ചു [ചെകുത്താനെ സ്നേഹിച്ച മാലാഖ ] 1103

എന്തായാലും ഇത്രയും നാളായി ഉത്സവം കൊടിയേറി തീരുന്നത് വരെ നീ ഒന്ന് ക്ഷമിക്ക് , അതുവരെയായിട്ടും ഒരു വഴിയും തുറന്നില്ലെങ്കിൽ നിനക്ക് പിന്നെ നിന്റെ ഇഷ്ടം പോലെ ചെയ്യാം . പാസ്റ്റ് ഈസ് പാസ്റ്റ് ഒന്നും തിരുത്താനോ മാറ്റാനോ കഴിയില്ല . കഴിഞ്ഞതിനെപ്പറ്റി ഓർത്ത് ദുഃഖിക്കാതെ ഇനിയെന്ത് എന്ന് ചിന്തിക്ക് .

ഒരു സമയത്ത് നിന്റെ ഇതേ സിറ്റുവേഷനിലൂടെ ഞാനും കടന്ന് പോയതാ , കുറേ രാത്രികൾ കരഞ്ഞ് തീർത്തു എന്നല്ലാതെ മറ്റൊന്നും സംഭവിച്ചില്ല . അന്ന് മനസ്സിലായി കഴിഞ്ഞതിനെപ്പറ്റി ചിന്തിച്ച് സങ്കടപ്പെട്ടാൽ അതിനേ പറ്റൂ , മറിച്ച് ഒരു പ്രയോജനവും അതിനില്ല താനും . നമ്മളെ വേണ്ടാത്തവരെ നമുക്കും വേണ്ടടാ …. നീ കിടക്കാൻ നോക്ക് …. ”

രുദ്രനതും പറഞ്ഞ് തിരികെപ്പോയി , ആദിയാകട്ടെ പതിയെ ബെഡിലേക്ക് കിടന്നു .

പക്ഷെ കണ്ണടയ്ക്കാൻ കഴിയുന്നില്ല മുന്നിൽ വരുന്നത് അവളുടെ മുഖം …. രണ്ടോ മൂന്നോ വട്ടം മാത്രം കണ്ട ആ മുഖം അത് ഇത്രയും ആഴത്തിൽ മനസ്സിൽ പതിയാനുള്ള കാരണം , അവളോട് ഇത്രയും ഇഷ്ടം തോന്നാനുള്ള കാരണം , അവളെ നഷ്ടപ്പെടും എന്നറിഞ്ഞപ്പോഴുളള വീർപ്പ് മുട്ടൽ ഒരു തരം ഭ്രാന്തമായ അവസ്ഥ ഇതിന്റെയൊക്കെ കാരണമെന്തെന്ന് അവൻ ആവർത്തിച്ച് ചിന്തിച്ചു നോക്കി സ്വയം ചോദിച്ച് നോക്കി പക്ഷെ ഉത്തരം മാത്രം കിട്ടുന്നില്ല .

എന്തോ മുൻ ജന്മ ബന്ധം പോലെ എത്രത്തോളം മറക്കാൻ ശ്രമിക്കുന്നോ അതിന്റെ ഇരട്ടി സ്നേഹവും പ്രണയവും അവളോട് തോന്നുന്നത് പോലെ പക്ഷെ അപ്പോഴും അവന്റെ ഉള്ളിലിരുന്ന് ആരോ പറയുന്നത് പോലെ ‘ ഒരിക്കലും അവളെ നിനക്ക് നേടാൻ കഴിയില്ല എന്ന് …. ‘