ബറാക്കയുടെ പ്രതികാരവും പ്രണയവും [ഫ്ലോക്കി കട്ടേകാട്] 90

ജൂഡോയുടെ വാക്കുകൾ  അവൾക് കാര്യങ്ങൾ മനസ്സിലായി. കലുമ്പൻ മലയെ ലക്ഷ്യമാക്കി അവര് നീങ്ങി. ചെറിയ പാറക്കെട്ടുകൾ വലിഞ്ഞു കയറി രണ്ട് പേരും  നടന്നു. കലുമ്പൻ മലയിലേക്കുള്ള ദൂരം കുറഞ്ഞു കൊണ്ടിരുന്നു. കണ്ണിനു മുന്നിൽ ഉദ്ദേശം ഒരു മണിക്കൂറിന്റെ യാത്ര കൂടിയേ ഉണ്ടാകു. ട്രീസക്ക് ശരിയായി നടക്കാൻ കഴിയുമായിരുന്നു എങ്കിൽ അതിനു മുൻപ് തന്നെ എത്തിയേനെ.

എന്നാൽ വിധി അവർക്കു വേണ്ടി മറ്റൊരു പ്രതിസന്ധി കാത്ത്  വെച്ചിട്ടുണ്ടായിരുന്നു  ജീവിതം കയ്യിൽ പിടിച്ച് രണ്ട് ദിവസത്തെ യാത്രയിൽ തിരികെ ലഭിക്കുന്നതിനു തൊട്ടു മുമ്പുള്ള ആ നിമിഷം, തിളങ്ങുന്ന കണ്ണുകൾ അവർക്കു മുന്നിൽ വീണ്ടും പ്രത്യക്ഷമായി. ഇത്തവണ പക്ഷെ ഒട്ടും ശാന്തനായിരുന്നില്ല. ഏകദേശം 50 വാര അകലെ നിൽക്കുന്ന തിളങ്ങുന്ന കണ്ണുള്ള കരിമ്പുലി, അവരെ നോക്കി ഒന്ന് മുരണ്ടു.

ട്രീസ ജൂഡോയുടെ കൈകളിൽ ചേർത്തു പിടിച്ച്. ഭയം അവളുടെ കൈകളെ മാത്രമായിരുന്നില്ല, ചുണ്ടുകളെയും  കൺപീലികളെ പോലും വിറകൊള്ളിച്ചു. എതിരിടാൻ കയ്യിൽ ആയുധം പോലുമില്ലാത്ത രണ്ട് കുട്ടികൾ അവനു സന്തോഷം നൽകുന്നുണ്ടാകാം, അവൻ ഒരടി മുന്നോട്ടു വെച്ചു. ട്രീസയും ജൂഡോയും  ഒരടി പിന്നോട്ട് വെച്ചു. അവൻ വാ തുറന്നു കൊണ്ട് മുരണ്ടു… കൂർത്ത പല്ലുകൾക്കിടയിൽ ഒലിക്കുന്ന വായ കാണുമ്പോൾ തന്നെ ട്രീസയിൽ ഭയം അരിച്ചു കയറി.

ജൂഡോ നാലുപാടും നോക്കി  വലതു വശത്തു  വലിയ പാറക്കൂട്ടങ്ങൾ,  തിങ്ങി നിൽക്കുന്ന മരങ്ങൾക്കിടയിലൂടെ എങ്ങനെ ഓടും എന്നറിയാതെ ശങ്കിച്ചു.പക്ഷെ സമയം കഴിഞ്ഞിരുന്നു. ലക്ഷ്യം നിറവേറാതെ  കാടിന്റെ  വന്യതയിൽ അലിഞ്ഞു പോകാൻ രണ്ട് പേരും മനസ്സിനെ പാകപ്പെടുത്തി.