ബറാക്കയുടെ പ്രതികാരവും പ്രണയവും [ഫ്ലോക്കി കട്ടേകാട്] 90

ഡ്രാക്കർ പല്ലുകൾ കൂട്ടി കടിച്ചു, ടൈക് പത്താമൻ കണ്ണിൽ നിന്ന് കണ്ണുനീർ തുള്ളികൾ ഒലിപ്പിച്ചു. തന്റെ അരിശം ഡ്രാക്കർ വാക്കിൽ തന്നെ പ്രകടിപ്പിച്ചു. സാഫ്രയോട് ഡ്രാക്കർ ദേഷ്യപ്പെട്ടു. എത്രയും വേഗം ഈ തെമ്മാടിത്തരം തിരുത്തി,  അവർക്ക് ലഭിക്കേണ്ട മാന്യമായ  മരണനന്തര ചടങ്ങുകൾ നടത്താൻ ഡ്രാകർ ആവിശ്യപെട്ടു…

അത്ര സമയം ചുണ്ടിൽ പരിഹാസച്ചിരി ചിരിച്ച സാഫ്ര  ഞൊടിയിൽ തിരിഞ്ഞു. തന്റെ ഉറയിലെ വാൾ ഊരിയെടുത്തു  ഡ്രാക്കറിന്റെ കഴുത്തിനു നേരെ വീശി. ചുറ്റുമുള്ളവർ എല്ലാം ഒരു നിമിഷം ശ്വാസം പിടിച്ചു നിന്നു. ആ വലിയ നടുമുറ്റം ഒരൊറ്റ നൊടിയിൽ നിശബ്ദമായി. ആഞ്ഞു വീശിയ വാൾ വായുവിൽ ഒരു മൂളലിനെ സൃഷിടിച്ചു കൊണ്ട് ഡ്രാക്കറിന്റെ കഴുത്തിനെ ലക്ഷ്യമാക്കി വന്നു കൊണ്ടിരുന്നു. ഡ്രാക്കർ തന്റെ കണ്ണുകൾ അടച്ചു.

എന്നാൽ സാഫ്രയുടെ വാൾ ഡ്രാക്കറിന്റെ കഴുത്തിൽ വന്നു നിന്നു. സാഫ്ര ചുണ്ടുകൾ മുകളിലേക്ക് കോട്ടി പിടിച്ചു.  കണ്ണുകളിൾ ക്രൂരഭാവം, കവിളുകൾ ചുവന്നു….

“ഓർമിച്ചു കൊള്ളുക, ഇത് സാഫ്രയുടെ രാജ്യം, ഇവിടെ ഞാൻ ആണ് നീതി, ഞാൻ ആണ് ന്യായം….. “

സാഫ്ര, ഡ്രാക്കറിനു താക്കീത് നൽകി.

ഡ്രാക്കർ, സാഫ്രയെ രൂക്ഷമായി ഒന്ന് നോക്കി. വലതു കൈ കൊണ്ട്, തന്റെ കഴുത്തിൽ ഇരിക്കുന്ന സാഫ്രയുടെ വാളിൽ പിടിച്ച് അത് തന്റെ  നെഞ്ചിന് മുകളിൽ വെച്ച് നെഞ്ചിലേക്കമർത്തി.  സാഫ്രയുടെ വാൾ ഡ്രാക്കറിന്റെ തോൽകുപ്പായം തുളച്ചു നെഞ്ചിൽ തട്ടി….

“ചുണയുള്ള പോരാളി, ഒരുവെട്ടിനു തല കൊയ്യാൻ ഏതൊരാൾക്കും കഴിയും . പക്ഷെ വാൾ നെഞ്ചിൽ കുത്തിയിറക്കണം…. നെഞ്ച് പൊളിഞ്ഞു രക്തം പുറത്തു വരുന്നത് കണ്ടു കൊണ്ട് കൊല്ലണം.”