ബറാക്കയുടെ പ്രതികാരവും പ്രണയവും [ഫ്ലോക്കി കട്ടേകാട്] 90

മൂന്നു മണിക്കൂർ മുന്നേ ആദ്യം വന്നത്, ഇരുമ്പിൽ സിംഹത്തിന്റെ  മുഖമുള്ള പടച്ചട്ടയണിഞ്ഞ ഒരു പെണ്ണ്.  കണ്ണടച്ച് തുറക്കും മുന്നേ അവളെയ്ത അമ്പ് അമ്മയുടെ വലതു മാറ് തുളച്ചു പുറകിലൂടെ പുറത്തേക്കു നിന്നു. എന്താണ് സംഭവിക്കുന്നത് എന്നറിയുന്നതിനു മുൻപ് അവളുടെ കുതിരകൾ തനിക്കരികിലെത്തി. ആഞ്ഞു വീശിയ അവളുടെ വാൾ തന്റെ ചെവിക്കരികിലൊരു മൂളക്കം ഉണ്ടാക്കിയത് ഓർമ്മയുണ്ട്. അമ്മയുടെ കൈകൾ എന്നെ തിരിച്ചു നിർത്തിയതാണ്. തിരിഞ്ഞു നോക്കുമ്പോൾ വലതു കൈ അറ്റ അമ്മ നിലത്തേക്ക് വീഴുന്നതാണ് കാണുന്നത്.  പിന്നിൽ നിന്നും കാളിയാണ് എന്നെ പിടിച്ചു വലിച്ചു കുടിലിന്റെ പിന്നിലേക്ക് നിറുത്തിയത്.  ഗ്രാമവാസികളുടെ അലർച്ചകൾക്കിടയിൽ ആരോ വിളിച്ചു പറയുന്നു…

“സാഫ്രാ…”

അവളുടെ മുഖം ഒന്ന് കൂടി നോക്കി, ഒരു ചിത്രമെന്നോണം ആ മുഖം ജൂഡോ  മനസ്സിൽ കോരിയിട്ടു. സാഫ്രയുടെ കുതിര, ശരവേഗത്തിൽ പാഞ്ഞു പോയി. അവളെ അനുഗമിച്ചു വന്ന പട ഗ്രാമം മുഴുവൻ എരിച്ചു കൊണ്ടിരിക്കുന്നു. കുടിലുകൾ ഓരോന്നായി കത്തിയമർന്നു. കത്തുന്ന മണ്ണിന്റെ മണം നാസിക തുളച്ചു കയറിയത് ജൂഡോ അറിഞ്ഞു.

അമ്മ എണീക്കാൻ ശ്രമിക്കുന്നുണ്ട്. ഓടി ചെന്ന് അമ്മയെ എണീപ്പിക്കണം എന്നുണ്ട്. എന്നാൽ അതിനു മുന്നേ വന്ന കുതിരയുടെ കുളമ്പുകൾ അമ്മയുടെ നെഞ്ചിൽ ചവിട്ടിയിറങ്ങി പോയി. ആദ്യ കുളമ്പിന്റെ ചവിട്ടിൽ അമ്മയുടെ വായിൽ നിന്നും ചോര ചിതറി തെറിച്ചത് ജൂഡോ, സ്വന്തം  കണ്ണുകൾ കൊണ്ട്  കണ്ടു. തൊട്ടു പിന്നിലായി വന്നവൻ അമ്മയുടെ വസ്ത്രങ്ങളെ വലിച്ചു കീറി. പാതി ജീവനിലും നാണം മറക്കാൻ ശ്രമിക്കുന്ന അമ്മയുടെ പരിശ്രമം ജൂഡോയുടെ  ചങ്കിൽ ഒരു വേദനയായി. മറ്റൊരു പടയാളി തന്റെ കുന്തത്തിൽ അമ്മയുടെ ശരീരം ചേർത്ത് കുത്തി.