ബറാക്കയുടെ പ്രതികാരവും പ്രണയവും [ഫ്ലോക്കി കട്ടേകാട്] 90

ആലോചിച്ചു കൊണ്ട് സാഫ്ര അന്തപുരത്തിലെ  മെത്തയിലേക്ക് മറിഞ്ഞു……. പതിയെ അവൾ ഉറക്കത്തിന്റെ ആലസ്സ്യത്തിലേക്ക് ആണ്ടു…..

++++++++++

യുദ്ധം കഴിഞ്ഞെങ്കിലും  ബറാക്കയുടെ പല പ്രദേശങ്ങളും ഒക്കോവൻ സൈനികരുടെ ക്രൂരതകൾ നിറഞ്ഞു കൊണ്ടിരുന്നു. പലായനത്തിനു പോലും മറ്റിരു രാജ്യമില്ലാതെ ബറാക്കൻ ജനത തീർത്തും വലഞ്ഞു. തകർന്നു കിടക്കുന്ന ബറാക്കയുടെ നഗരത്തിന്റെ തെരുവിലൂടെ പതിനാല് വയസ്സുള്ള ബറാക്കയുടെ കൊച്ചുമകൾ നൈജ നടന്നു. രാത്രിയുടെ ഇരുട്ടിൽ അവൾ എങ്ങോട്ടെന്നില്ലാതെ നടന്നു.  ഉറൂസോ തന്നെയും കൊണ്ട് കൊട്ടാരത്തിന്റെ ഇരുൾ നിറഞ്ഞ ഭൂഗർഭ വഴിയിലൂടെ രക്ഷപെട്ടതാണ്.  തന്റെ അച്ഛനും അമ്മയുമടക്കം കൊട്ടാരത്തിലെ സകലരെയും സാഫ്രയുടെ പട കൊല്ലുന്നതിന്റെ നേർ സാക്ഷി.

രാത്രിയിൽ ഉറൂസോ എവിടെയോ പോയി, തിരിച്ചു വന്നിട്ടില്ല.  പൊളിഞ്ഞു കിടക്കുന്ന കെട്ടിടങ്ങളുടെ അവശിഷ്ടങ്ങൾക്ക് മുകളിലൂടെ നൈജ നടന്നു. വിശപ്പ് കലശമായിരിക്കുന്നു. നൈജ ചുറ്റുപാടും നോക്കി. നിറയെ ശവങ്ങളും യുദ്ധത്തിന്റെ ആവശ്ഷ്ടങ്ങളും.  നിലത്തു വീണു കിടക്കുന്ന പച്ചക്കറികൾ  കണ്ണുകളിൽ പതിഞ്ഞു. നിലത്തു കിടക്കുന്നതിൽ നിന്നും ഒരെണ്ണമെടുത്ത്, കടിച്ചു.

“ഹേയ് പെണ്ണെ……”

പിന്നിൽ നിനുമുള്ള ഗംഭീരമായ ശബ്ദം കേട്ട് നൈജ ഒന്ന് തിരിഞ്ഞു നോക്കി. ഭയം കൊണ്ട് നൈജ ചെറുതായി വിറക്കുന്നുണ്ടായിരുന്നു. കയ്യിലെ കേരറ്റ് പിന്നിലേക്ക് പിടിച്ചു. നൈജ പതിയെ ഒരു കാൽ ചുവട് പിന്നിലേക്ക് വെച്ചു. അപരിചിതൻ നൈജയെ തന്നെ അടിമുടി ഒന്ന് നോക്കി… ദൂരെ നിന്നും കുതിരകളുടെ കുളമ്പടി ശബ്ദം കേൾക്കാം. അപരിചിതൻ നൈജയെ പിടിച്ച് പാതി തകർന്ന കെട്ടിടത്തിന്റെ ഉള്ളിലേക്ക് കയറി. ഭയം കൊണ്ട് നൈജ ഉറക്കെ നിലവിളിക്കാൻ തുടങ്ങി. ശബ്ദം പുറത്തു വരാതിരിക്കാൻ, അപരിചിതൻ അവളുടെ വായ കൈ കൊണ്ട് പൊത്തിപ്പിടിച്ചു. നൈജയുടെ കണ്ണുകളിൾ ഭയം നിറഞ്ഞു  ചുറ്റിലും ഇരുട്ട് പടരുന്ന പോലെ അവൾക്കു തോന്നി..