പ്രണയിനി [മാലാഖയുടെ കാമുകൻ] 2088

എനിക്ക് സന്തോഷവും, സങ്കടവും, കരച്ചിലും എല്ലാം ഒരുമിച്ചു വന്നു.. എന്താ ഇപ്പൊ ചെയ്യുക?

ഞാൻ ബൈക്ക് മെല്ലെ മുൻപോട്ട് എടുത്തു.. വീട്ടിൽ എത്തി അമ്മയും എസ്തേറും എന്തൊക്കെയോ ചോദിച്ചത് ഞാൻ കേട്ടില്ല.

“ഈ ചെക്കൻ ആ പെണ്ണ് വന്നതിൽ പിന്നെ ഇങ്ങനെ ആണ്…എന്താകുമോ എന്തോ…”

അത് മാത്രം കെട്ടു.. റൂമിൽ പോയി കിടന്നു.. കാത്തിരുന്നത് വെറുതെ ആയില്ല എന്നൊരു തോന്നൽ..

അവളുടെ നമ്പർ എവിടെ നിന്നാണ് കിട്ടുക? അല്ല.. ബാങ്കിൽ വന്നപ്പോൾ നമ്പർ തന്നല്ലോ? അതിനിപ്പോ ബാങ്കിൽ പോകണ്ടേ.. എന്തൊരു പൊട്ടൻ ആണ് ഞാൻ..

അവളുടെ വീട്ടിൽ പോയാലോ? ഞാൻ ചാടി എണീറ്റ് സമയം നോക്കി.. ഒരു 11 മണി ആയിട്ട് പോകാം..

അടുത്ത മണിക്കൂറുകൾ ഒച്ച് ഇഴയുന്നത് പോലെ ആയിരുന്നു..
വളരെ പതുക്കെ. രാത്രി എങ്ങനെയോ ഭക്ഷണം കഴിച്ചു എന്ന് വരുത്തി ഞാൻ വേഗം കിടക്കാൻ പോയി.

പത്തര ആയപ്പോൾ പതുങ്ങി അടുക്കള വഴി പുറത്തിറങ്ങി മതിൽ ചാടി കടന്നു..
മെല്ലെ റോഡിലൂടെ അവളുടെ വീട്ടിലേക്ക്. അവിടെയും മതിൽ ചാടി പുറകോട്ട് ചെന്ന് കോവണി പൊക്കി എടുത്തു അവളുടെ റൂമിന്റെ ജനാലയുടെ അവിടെ വച്ചു.

ജനാല തുറന്നു കിടക്കുന്നുണ്ട്.. അതിൽ നിന്നും വെളിച്ചവും. ഞാൻ മരകോവണി ശബ്ദം കേൾപ്പിക്കാതെ കയറി മുകളിൽ എത്തി.

അകത്തേക്ക് നോക്കി.. അവൾ ബെഡിൽ കിടക്കുന്നുണ്ട്.. കമിഴ്ന്നു കിടക്കുന്നു..
ഒരു കറുത്ത പാന്റും ഇളം റോസ് ബനിയനും ആണ് വേഷം. മുടി കെട്ടി വച്ചിട്ടുണ്ട്..

“ഡീ….! “

ഞാൻ വിളിച്ചു.. അനക്കം ഇല്ല..

“ഡീ അഭി…”

അവൾ എന്തോ കേട്ടത് പോലെ തല പൊക്കി.. നേരെ ജനലിലെക്ക്‌ നോക്കി..