💫💛__സുനന്ദാ__💛💫 ( The Alternate Version)

Author : [ 𝓐𝓼𝓱𝔀𝓲𝓷𝓲 𝓚𝓾𝓶𝓪𝓪𝓻𝓪𝓷 ]

 

ഹലോ ഗയ്‌സ്,  ഇതൊരു “Alternate Version ” സ്റ്റോറിയാണ്… മനസ്സിൽ ഐഡിയ കിട്ടിയപ്പോൾ പെട്ടന്നു എഴുതിയ കഥ. കഥയിൽ അവിടെയും ഇവിടെയും   സംശയമുണ്ടാക്കുന്ന  ചില ഭാഗങ്ങൾ ഉണ്ടാകാം…

അതൊക്കെ സദയം ക്ഷമിക്കുക…

ഇനി കഥയിലേക്ക്…

 

 

സുനന്ദാ

മുംബൈയിലെ ദാദർ ബീച്ചിൽ ഞാൻ വാരാന്ത്യദിനങ്ങളിൽ ചെല്ലുമ്പോഴൊക്കെയും തിരക്കാണ്. തിരകൾ, കരയിലേക്കടുക്കാൻ തിരക്ക് കൂട്ടുന്നത് പോലെ, ദിക്കുകളിൽ നിന്നും ആളുകൾ അവിടേക്ക് കൂടാനും തിരക്ക്.

 

വെട്ടം വീഴും മുൻപുള്ള പുലരികളിലും, വെട്ടം മറഞ്ഞതിനു പിൻപുള്ള രാത്രികൾക്കും തിരക്കുതന്നെ.

 

ഈ നഗരത്തിൽ വന്ന അന്നുമുതൽ തന്നെയുള്ള ശീലമാണ് ഈ പുലരികളെയും രാത്രികളെയും തിരകളുടെ നിരകളോടൊപ്പം വീക്ഷിക്കുക എന്നത്. ദാദറിലെ മാനേജ്‍മെന്റ് കോളേജിലെ, സാമ്പത്തികശാസ്ത്ര അധ്യാപകനായ അരുണോദയ് എന്ന എന്റെ അധ്യാപനദിനങ്ങൾക്കിടയിലുള്ള ഇടത്താവളമായി ഇപ്പോഴത് മാറിയിരിക്കുന്നു.

 

കാലത്തെന്നും കാണുന്ന ചില സ്ഥിരം മുഖങ്ങളുണ്ട്, ചിലർ പുഞ്ചിരികൊണ്ട് അത് സുന്ദരമാക്കും, ചിലർ വിദൂരത യിലേക്ക് നോട്ടമെറിഞ്ഞത് പരിചിതമല്ലാതെയാക്കും.

 

അത്തരം പുലരികളുടെ സ്ഥിരം സാന്നിധ്യമാണ്, റിക്ഷാസൈക്കിളിൽ വന്ന് രാവിലെ തന്നെ ഞാൻ താമസിച്ചിരുന്ന വീടിനടുത്തുള്ള വീടുകളിലെ ഓരോ ഫാമിലിയിൽ നിന്നും ടിഫിനുകൾ കളക്റ്റ് ചെയ്ത്,

ഉച്ചസമയങ്ങളിൽ, ടിഫിനുകൾ കൃത്യമായി വേണ്ടപെട്ടവർക്ക് എത്തിക്കുന്ന ഒരാളെ… ഒരു ഡബ്ബാവാലായെ, ഞാൻ എല്ലായ്പ്പോഴും കാണാറുണ്ടായിരുന്നു.

 

അയാളുടെ എപ്പോഴെത്തെയും വേഷം, വെള്ള കോട്ടൺ തൊപ്പിയും കാക്കിഷർട്ടും, ബ്രൗൺ പാന്റ്സുമായിരുന്നു. കൂടാതെ ഇടയ്ക്ക് അയാളുടെ കൂടെ, എല്ലായ്പോഴും ഇരുണ്ട നിറത്തിലുള്ള വസ്ത്രങ്ങളുമിട്ടു വരുന്ന വെള്ളാരം കണ്ണുകളുള്ള ഒരു പെൺകുട്ടിയെയും ഞാൻ കാണാറുണ്ടായിരുന്നു. അവൾക്ക് ഒരു ഇരുപതിനാലു വയസ്സ് പ്രായം കാണും.

 

അവരോടോരിക്കലും ഞാൻ സംസാരിച്ചിരുന്നില്ല. എങ്കിലും ആ പെൺ കുട്ടിയുടെയും, അവളുടെ അച്ഛന്റെയും പേരുകൾ ഞാൻ ഞാനറിഞ്ഞു. ഭാർഗവ് ശേഖറും, മകൾ സുനന്ദാ ശേഖറുമായിരുന്നു അത്.