💛💫__സുനന്ദാ__💫💛 ( The Alternate Version) [അശ്വിനികുമാരൻ] 1054

ഭാർഗവിന്റെ ചെറുപ്പകാലത്ത്, ഒരു ദിവസം, ഡബ്ബാവാലാപണി കഴിഞ്ഞ് മടങ്ങുകയായിരുന്ന ഭാർഗവിനു വഴിവക്കിൽ നിന്നും ഒരു ചോരകുഞ്ഞിനെ കിട്ടി. പ്രസവിച്ചയുടനെ ഉപേക്ഷിക്കപ്പെട്ട ഒരു പെൺകുഞ്ഞായിരുന്നു അത്.

അയാൾക്ക് ആ കുഞ്ഞിനെ കണ്ട് കഷ്ടവും, ദയവും തോന്നി പോലീസിൽ ഏൽപ്പിക്കാതെ വീട്ടിലേക്ക് കൊണ്ടുവന്നു.

അയാൾ പ്രതീക്ഷിച്ചത് പോലെ തന്നെ വീട്ടുകാരും നാട്ടുകാരും അയാളെ എതിർത്തു. പലരും, ആ കുഞ്ഞിനെ പോലീസിലോ, അല്ലെങ്കിൽ ഓർഫനേജിലോ ഏൽപ്പിക്കാനാവശ്യപ്പെട്ടു

എന്നാൽ അയാൾ വഴങ്ങിയില്ല.

ഭാർഗവ് വിവാഹിതനായി, ദിവസങ്ങൾക്കകമായിരുന്നു ഈ സംഭവങ്ങളെല്ലാം.

വിവരമറിഞ്ഞപ്പോൾ അയാളുടെ ഭാര്യ,

പദ്മാദേവി പൊട്ടിതെറിച്ചു. അവളും അയാളോട് കയർത്തു സംസാരിച്ചുവെങ്കിലും ഭാർഗവ് , അവളെ സമാധാനപ്പെടുത്തി, ആ കുഞ്ഞിനെ നമ്മുടെ മകളായി വളർത്താമെന്നു അവളെ പറഞ്ഞു മനസിലാക്കിച്ചുവെങ്കിലും, പിനീടുള്ള കാര്യങ്ങൾ അയാൾക്ക് അത്ര എളുപ്പമായില്ല.

ഊരും, പേരുമറിയാതെ എവിടെയോ കിടന്ന കുഞ്ഞിനെ വീട്ടിൽ കയറ്റി, കുടുംബത്തിന്റെ പേരിനു കളങ്കം വരുത്തിയെന്നാരോപിച്ച് ഭാർഗവിനെയും പദ്മയെയും, കുടുംബവും ബന്ധുക്കളും ഒറ്റപ്പെടുത്തിയതോടെ, ഭാർഗവ് കൈകുഞ്ഞുമായി ഭാര്യയോടൊപ്പം പൂനെയിലേക്ക് വണ്ടികയറി.

ഭാർഗവും, കുടുംബവും അവിടെ അവരുടെ പുതുജീവിതം തുടങ്ങി. കുഞ്ഞിന് സുനന്ദയെന്ന് പേരിട്ടത് പദ്മയായിരുന്നു.

വള്ളാരം കണ്ണുകളുള്ള ഒരു മറാത്തി പെൺകൊടിയായി സുനന്ദ അങ്ങനെ വളർന്നു വന്നു.

അല്ലല്ലില്ലാതെ, അച്ഛന്റെയും അമ്മയുടെയും പൊന്നുമോളായി അവൾ വളർന്നു. ഭാർഗവിനെക്കാളേറെ നന്ദയെ സ്നേഹിച്ചിരുന്നത് പദ്മാദേവിയായിരുന്നു.

സുനന്ദയ്ക്കും അങ്ങനെ തന്നെയായിരുന്നു.

അവൾക്ക് എട്ട് വയസുള്ളപ്പോൾ പദ്മ ഗർഭിണിയായി… തനിക്ക് കൂട്ടുകൂടാനും കളിക്കാനും വൈകാതെ ഒരു അനിയനെ കിട്ടുമെന്ന് അച്ഛൻ പറഞ്ഞപ്പോൾ, ആ കുഞ്ഞു മനസ്സ് വളരെയധികം സന്തോഷിച്ചു. നന്ദ, തനിക്ക് ഒരു അനിയനെയും കിട്ടുന്നത് കാത്ത് സ്വപ്നവും കണ്ട് നാളുകൾ തള്ളിനീക്കി.