? ദിയ – 3 ? [ ചെകുത്താനെ സ്നേഹിച്ച മാലാഖ ] 706

അച്ഛൻ ഒരു ബിസിനസ്സുകാരനായിരുന്നു , G K ഗ്രൂപ്പിന്റെ ഉടമസ്ഥൻ …. കൺസ്ട്രക്ഷൻ , ഫിനാൻസ് , ഹോസ്പിറ്റൽ , കോളേജ് , ജുവലറി , ടെക്സ്റ്റയിൽസ് , മാൾ അങ്ങനെ എല്ലാ മേഖലകളിലും G K ഗ്രൂപ്പിന് സ്വയമായി ഒരു വലിയ സ്ഥാനമുണ്ടായിരുന്നു …

എന്റെ മുത്തശ്ശന്റേതായിരുന്നു ഈ ബിസിനസ്സ് ഗ്രൂപ്പ് , മുത്തശ്ശന്റെ മരണ ശേഷം അച്ഛന്റെ കയ്യിലേയ്ക്ക് വന്നപ്പോൾ G K ഗ്രൂപ്പ് പതിന്മടങ്ങ് വളർന്നു , അല്ല അച്ഛൻ കഷ്ടപ്പെട്ട് ഉയർത്തിക്കൊണ്ട് വന്നു . അച്ഛന് അമ്മയെ ജീവനായിരുന്നു അമ്മയ്ക്ക് തിരിച്ചും … ഞാനും അമ്മയും അച്ഛനുമടങ്ങുന്ന കൊച്ചു കുടുംബം . അതായിരുന്നു എന്റെ ലോകം .

എനിക്ക് പതിനഞ്ച് വയസ്സുള്ളപ്പോഴാ അമ്മ ഒരു ആക്സിഡന്റിൽ മരിക്കുന്നത് …. അതെനിക്ക് വലിയ ഒരു ഷോക്കായിരുന്നു . അച്ഛനാണെങ്കിൽ മനസ്സ് പകുതി തളർന്ന അവസ്ഥയിലായി . പക്ഷെ എനിക്ക് വേണ്ടി എന്നെ നന്നായി വളർത്താൻ വേണ്ടി അച്ഛൻ വേഗം ആ അവസ്ഥയിൽ നിന്ന് റിക്കവറായി . അമ്മയില്ലാത്തതിന്റെ ഒരു കുറവും ഇല്ലാതെ അച്ഛൻ എന്നെ നോക്കി …

ഒരു പെൺകുട്ടിയല്ലേ നിനക്കുള്ളത് , വളർന്ന് വരുന്ന അവൾക്ക് ഒരമ്മയുടെ ആവശ്യമുണ്ട് എന്നൊക്കെ അച്ഛന്റെ അടുത്ത സുഹൃത്തും ബിസിനസ്സ് പാട്ണറുമായ മഹേന്ദ്രനാഥ് പറഞ്ഞ് നിർബന്ധിച്ചപ്പോൾ അത് ശരിയാണെന്ന് തോന്നി അച്ഛൻ വീണ്ടും ഒരു വിവാഹം കഴിക്കാൻ സമ്മതിച്ചു , അതും എന്റെ ജീവിതത്തെ കുറിച്ച് മാത്രം ഓർത്ത് .

അമ്മ മരിച്ച് രണ്ട് വർഷങ്ങൾക്ക് ശേഷം
മഹേന്ദ്രനാഥിന്റെ പേഴ്സണൽ സ്റ്റാഫ് ആയിരുന്ന
ജയലക്ഷ്മിയെ അച്ഛൻ വിവാഹം കഴിച്ചു .