? ദിയ – 3 ? [ ചെകുത്താനെ സ്നേഹിച്ച മാലാഖ ] 706

പക്ഷെ അതിൽ അവർക്ക് ഒരു തെറ്റ് പറ്റി , അച്ഛൻ കൊല്ലപ്പെടുന്നതിന് കുറച്ച് ദിവസങ്ങൾക്ക് മുൻപ് എല്ലാ സ്വത്തും എന്റെ പേരിൽ എഴുതി വച്ചിരുന്നു , ആ ഡോക്യുമെന്റ്സ് അച്ഛൻ അത്രയും വിശ്വാസമുള്ള ആരുടെയോ പക്കൽ സൂക്ഷിക്കാനും ഏൽപ്പിച്ചു … ഈ കാര്യങ്ങൾ ആരോടും പറയാതെ അച്ഛൻ രഹസ്യമാക്കി വച്ചു സ്വന്തം സുഹൃത്തിനോട് പോലും പറയാതെ ……

അച്ഛൻ മരിച്ച ശേഷമാണ് വക്കീൽ വഴി എന്റെ രണ്ടാനച്ഛനും രണ്ടാനമ്മയും ഈ വിവരങ്ങൾ അറിഞ്ഞത് . എന്റെ പേരിൽ എഴുതി വച്ചിരിക്കുന്ന ആ സ്വത്തിൽ അച്ഛൻ ചില വ്യവസ്ഥകൾ കൂടി ചേർത്തിരുന്നു . എനിക്ക് ഇരുപത്തിരണ്ട് വയസ്സ് തികയാതെ എനിക്ക് പോലും സ്വത്ത് ക്രയവിക്രയം ചെയ്യാൻ സാധിക്കില്ല , അതിന് മുൻപ് എനിക്ക് എന്തെങ്കിലും സംഭവിച്ചാൽ സ്വത്തെല്ലാം ഒരു ചാരിറ്റബിൾ ട്രസ്റ്റിന് പോയി ചേരും ….. എനിക്കല്ലാതെ മറ്റാർക്കും പാരമ്പര്യസ്വത്ത് എന്ന അവകാശവും ഉണ്ടാകില്ല ….

ഈ കാര്യങ്ങൾ അറിഞ്ഞതോടു കൂടി എന്നെ കൊല്ലാനുള്ള അവരുടെ പദ്ധതി അവർ തൽക്കാലത്തേയ്ക്ക് ഉപേക്ഷിച്ചതാണെന്നും എനിക്ക് ഇരുപത്തിരണ്ട് വയസ്സ് തികയുന്ന സമയത്ത് അവർ എന്റെ കയ്യിൽ നിന്ന് സ്വത്ത് തട്ടിയെടുക്കാൻ ശ്രമിക്കുമെന്നും എന്നോട് സൂക്ഷിക്കണമെന്നും എന്നെ ഫോൺ വിളിച്ച അയാൾ പറഞ്ഞു .

സ്വത്തെല്ലാം അച്ഛൻ എന്റെ പേരിൽ എഴുതി വച്ചിരിക്കുന്ന ആ ഡോക്യുമെൻസ് കിട്ടാതെ അവർക്ക് ഒന്നും ചെയ്യാൻ കഴിയില്ല എന്നും അതുകൊണ്ട് എടുത്ത് ചാടി ഒന്നും ചെയ്യരുത് അത് അപകടം സൃഷ്ടിക്കുമെന്നും അയാൾ പറഞ്ഞു .