? ദിയ – 2 ? [ചെകുത്താനെ സ്നേഹിച്ച മാലാഖ] 696

 

 

” എന്നാ … ശരി രാഘവേട്ടാ … ”

 

ഞാൻ ഒരു പുഞ്ചിരിയോടെ അതും പറഞ്ഞ് തിരികെ വീട്ടിലേയ്ക്ക് നടന്നു …

…………………

 

” അമ്മേ കഴിക്കാൻ എന്താ … ”

 

വീട്ടിലെത്തി , ഡൈനിങ്ങ് ടേബിളിൽ ചെന്നിരുന്ന ശേഷം അടുക്കള ലക്ഷ്യമാക്കി ഞാൻ വിളിച്ച് ചോദിച്ചു . എന്നിട്ട് ഫോണെടുത്ത് വെറുതെ അതിലെ മെസേജൊക്കെ നോക്കി ഇരുന്നു …
അൽപ്പം കഴിഞ്ഞതും ഒരു പ്ലേറ്റൽ ചൂട് പാറുന്ന പുട്ടും കടലയും എന്റെ മുന്നിലെത്തി …. ഫോണിൽ നിന്ന് മുഖമുയർത്തി നോക്കിയപ്പോൾ ദാ വീണ്ടും മുന്നിൽ ദിയ തന്നെ ….. ഞാൻ ഫോൺ ഷർട്ടിന്റെ പോക്കറ്റിൽ വച്ചു .

 

” അമ്മ …. എവിടെ ? ”

 

ഞാൻ അവളോട് ചോദിച്ചു ….

 

 

” അടുക്കളയിലുണ്ട് …. ”

 

അവൾ ഉടനെ മറുപടി പറഞ്ഞു …

 

 

” അല്ല …. താൻ ഇത്ര പെട്ടെന്ന് എങ്ങനെയാ ഇങ്ങനെ ചെയിഞ്ചായത് …. ഞാൻ ഒന്ന് ഉറങ്ങി എണീറ്റപ്പോഴേയ്ക്കും ഇവിടെ എന്താ നടന്നേ ? ”

 

ഞാൻ ആകാംഷയോടെ ചോദിച്ചു …

 

 

” അത് …. അമ്മ എന്നോട് കുറേ സംസാരിച്ചു , പേടിക്കണ്ട , ഇനി ഇങ്ങനെ സങ്കടപ്പെട്ടിരിക്കരുത് എന്ന് പറഞ്ഞു … ”

 

അവൾ മടിച്ച് മടിച്ച് പറഞ്ഞു …

 

 

” ഏത് അമ്മ …. ”

 

ഞാനൽപ്പം ഗൗരവത്തോടെ ചോദിച്ചു …

 

 

” ഏട്ടന്റെ അമ്മ …. എന്നോട് പറഞ്ഞു ആന്റി എന്ന് വിളിക്കണ്ട അമ്മ എന്ന് വിളിച്ചാൽ മതിയെന്ന് … ”

 

അവൾ തല കുനിച്ച് നിന്ന് പറഞ്ഞു ഒപ്പം മുഖത്ത് ഒരു സങ്കടഭാവവും വന്ന് നിറഞ്ഞു … അത് കണ്ടതും എനിക്ക് ചിരിയാണ് വന്നത് .
ഞാൻ ചിരിക്കുന്നത് കേട്ട് അവൾ മുഖമുയർത്തി എന്നെ നോക്കി …..