? ദിയ – 2 ? [ചെകുത്താനെ സ്നേഹിച്ച മാലാഖ] 696

” ചേട്ടനോട് ഞാൻ ആദ്യമേ പറഞ്ഞതല്ലേ നിങ്ങൾക്കൊക്കെ ഞാൻ ഒരു ബാധ്യതയാകുമെന്ന് …. ഇപ്പൊ നിങ്ങൾക്കും കൂടി ഞാൻ കാരണം ആപത്ത് വരും എന്ന അവസ്ഥയായില്ലേ …. ഞാൻ എങ്ങോട്ടെങ്കിലും പൊയ്ക്കോളാം …. ”

അവൾ കരഞ്ഞു കൊണ്ട് പറഞ്ഞു .

” എങ്ങോട്ട് പോകാൻ …. താൻ എങ്ങോട്ടും പോകുന്നില്ല …. ഇത്രയും നേരം ഞാനും അമ്മയും പറഞ്ഞത് തനിക്ക് മനസ്സിലായില്ലേ …. ”

ഞാൻ ശബ്ദമുയർത്തി ദേഷ്യത്തിൽ പറഞ്ഞ ശേഷം നേരെ റൂമിൽ ചെന്ന് കട്ടിലിൽ കയറി കിടന്നു .

ഇനിയെന്ത് ചെയ്യണമെന്ന് ഒരു ഐഡിയയും മനസ്സിലില്ല … അവളുടെ പ്രശ്നം എന്താണെന്ന് അറിഞ്ഞാലെ ഒരു പരിഹാരം കണ്ടെത്താൻ സാധിക്കൂ … പക്ഷെ അത് പറയാനുള്ള മാനസിക അവസ്ഥ അവൾക്കിപ്പോഴും കൈവന്നിട്ടില്ല എന്ന് എനിക്ക് മനസ്സിലായി …..

അങ്ങനെ ഓരോ കാര്യങ്ങൾ ആലോചിച്ച് കിടന്നപ്പോഴേയ്ക്കും അമ്മ മുറിയിലേയ്ക്ക് വന്നു .

” അജൂ … നീ എന്തിനാ അവളോട് ദേഷ്യത്തിൽ സംസാരിച്ചത് , അവള് ദാ വീണ്ടും ഇരുന്ന് കരയുന്നു …. ”

അമ്മ ഉടനെ പറഞ്ഞു …

” കരയട്ടെ … ഇത്രയൊക്കെ ചെയ്തിട്ടും അവൾക്ക് ഏങ്ങോട്ടെങ്കിലും പോകണം എന്ന് പറയാൻ തോന്നിയില്ലേ …. ”

ഞാനതും പറഞ്ഞ് കട്ടിലിൽ എണീറ്റിരുന്നു .

” അജൂ …. അവൾ കാരണം നമുക്കൊരു ബുദ്ധിമുട്ട് ഉണ്ടാകരുത് എന്ന് കരുതി പറഞ്ഞതല്ലേ … അത് വിട്ട് കള …. പിന്നെ മോനേ … അവൾ ഇട്ടോണ്ട് വന്ന ഡ്രസ് അല്ലാതെ മാറി ധരിക്കാൻ അവൾക്ക് വേറെ ഒന്നുമില്ല …. ”