? ദിയ – 2 ? [ചെകുത്താനെ സ്നേഹിച്ച മാലാഖ] 696

” രാഘവേട്ടാ ….. ഒരു പെൺകുട്ടിയെ ഒരു അപകടത്തിൽ നിന്ന് രക്ഷിച്ചിട്ട് രാത്രി അവളെ റോഡിൽ ഇറക്കി വിടുന്നത് വീണ്ടും വലിയ ഒരു അപകടത്തിലേയ്ക്ക് തള്ളി വിടുന്നതിന് തുല്യമല്ലെ … എന്തായാലും തല പോകുന്ന പ്രശ്നമൊന്നുമല്ലല്ലോ … വരുന്നത് വരുന്നിടത്ത് വച്ച് കാണാമെന്നാ ഞാൻ തീരുമാനിച്ചിരിക്കുന്നത് . അമ്മയും അത് തന്നെയാ പറഞ്ഞത് … ”

ഞാൻ രാഘവേട്ടനോട് പറഞ്ഞു . എന്റെ മറുപടി കേട്ടതും പുള്ളി ഒന്ന് പുഞ്ചിരിച്ചു …

” ശങ്കറിന്റെ മകനല്ലേ നീ …. വിത്ത് ഗുണം പത്തു ഗുണം ….. ”

പുള്ളി അതും പറഞ്ഞ് ചിരിച്ചു ….

” ആര് സഹായം ചോദിച്ച് വന്നാലും മുന്നോട്ടോ പിന്നോട്ടോ ചിന്തിക്കാതെ ചാടി പുറപ്പെടുന്ന സ്വഭാവമായിരുന്നു നിന്റെ അച്ഛന് . അതേ സ്വഭാവം തന്നെയാ നിനക്കും കിട്ടിയിരിക്കുന്നത് … അജു എന്താവശ്യമുണ്ടെങ്കിലും പറയണം …. ഞാനുണ്ടെടാ കൂടെ …. ”

രാഘവേട്ടൻ ഒരു പുഞ്ചിരിയോടെ പറഞ്ഞു …

” ആ രാഘവേട്ടാ ബാക്കി പൈസ … ”

ഞാനതും പറഞ്ഞ് പോക്കറ്റിലിരുന്ന കാശെടുത്ത് നീട്ടി ….

” നീ ….. ചെയ്യുന്നതെല്ലാം ഉപകാരമായി കണ്ടാൽ നിന്റെ വീട് പട്ടിണിയാവും … ഉറക്കമിളച്ച് ഇത്രയും ദൂരം വണ്ടി ഓടിച്ചതല്ലേ ഇത് നീ വച്ചിരുന്നാൽ മതി … ”

രാഘവേട്ടൻ അതും പറഞ്ഞ് ആ കാശ് വാങ്ങി തിരികെ എന്റെ ഷർട്ടിന്റെ പോക്കറ്റിൽ തന്നെ വച്ച് തന്നു …