നിയോഗം Conclusion(മാലാഖയുടെ കാമുകൻ) 3025

അർച്ചന അവരെ മാറി മാറി ചുംബിക്കുന്നു.. മെറിൻ മാവിക്കോയുടെ വാലിൽ പിടിച്ചു നോക്കുന്നത് കണ്ടപ്പോൾ റോഷന് ചിരിപൊട്ടി..

“പാപ്പ…”

ശബ്ദം കേട്ട് നോക്കിയ മാവിക്കോ അവനെ വിളിച്ചുകൊണ്ടു എഴുന്നേറ്റു ഇരുന്നു.. അവൻ ചെന്ന് അവരുടെ നടുക്ക് ഇരുന്നു..

“മീനു അമ്മ ഞങ്ങൾക്ക് പേരിട്ടു പാപ്പ..”

അവൾ സന്തോഷത്തോടെ പറഞ്ഞു അവന്റെ കൈ പിടിച്ചു..

“എന്ത് പേര്..?”

അവൻ സംശയത്തോടെ അവളെ നോക്കി..

“ഞാൻ മിന്നു.. ഇത് പൊന്നു..”

അത് കേട്ടപ്പോൾ റോഷന് ചിരി അടക്കാൻ ആയില്ല.. അവൻ ചിരിച്ചുകൊണ്ട് മീനുവിനെ നോക്കി.. പഴയ കുറുമ്പി മീനു.. അവൾ ചിരി ഒതുക്കി ഇരിക്കുന്നു..

“നല്ല പേരാണ് കേട്ടോ.. മിന്നു മോളെ..”

റോഷൻ ചിരിയോടെ പറഞ്ഞതും എല്ലാവരും ചിരിച്ചു.. കുറെ ദിവസങ്ങൾക്ക് ശേഷം സന്തോഷം സമാധാനം ഒക്കെ അവിടെ നിറഞ്ഞു നിന്നു… അർച്ചനയും മീനുവും കുട്ടികളെ ഊട്ടുന്ന തിരക്കിൽ ആയപ്പോൾ മെറിൻ ലിസയോട് എന്തൊക്കെ സംഭവിച്ചു എന്ന് ചോദിക്കുകയായിരുന്നു..

അന്ന് എല്ലാവരും സമാധാനത്തോടെ ഉറങ്ങി..

***

“ഞാൻ കുറെ നാളത്തേക്ക് ലീവ് ആണ്.. അവർ എന്നെ കണ്ടാൽ കുത്തുകൊണ്ട മുറിവുകൾ നോക്കില്ലേ? അത് കാണണ്ട..മുറിവുകൾ ഒക്കെ മാറി എന്ന് പറഞ്ഞാൽ ആര് വിശ്വസിക്കാൻ ആണ്.? ഞാൻ നാട്ടിൽ പോയെന്ന് പറഞ്ഞു..”

ബാൽക്കണിയിൽ നിന്ന റോഷനോട് മെറിൻ പറഞ്ഞപ്പോൾ അവൻ അവളെ നോക്കി.. സന്തോഷത്തിൽ ആണ് അവൾ.. ലിസ കൂടെ അവിടേക്ക് വന്നു..

“നമുക്ക് ഒരു ജോലി കൂടെ ബാക്കിയുണ്ട്.. “

ലിസ മെല്ലെ പറഞ്ഞു.. മെറിനും റോഷനും അവളെ നോക്കി പുഞ്ചിരിയോടെ.. അവളും ചിരിച്ചു..

“യെസ്.. ഇന്ന് തന്നെ പോകാം.. “

അവൻ പറഞ്ഞു..

“എങ്ങോട്ട്…?”

മെറിൻ സംശയത്തോടെ ചോദിച്ചു.

“നമുക്ക് പിടി തരാത്ത ഒരുത്തി ഉണ്ട്.. ഒരുവനും.. കപ്പിൾസ് ആണ്.. നിന്നെ തീർക്കാൻ അവർ ആണ് ശോഭയിൽ അവരെ എത്തിച്ചത്.. ഇവിടെ ഒഴിഞ്ഞു കിടന്ന ഫ്ലാറ്റുകളിൽ അവർ പോലീസിനെ വെട്ടിച്ചു ആളെ കയറ്റി.. അപ്പോൾ അവരെ ഒന്ന് കാണണ്ടേ..?”

ലിസ പറഞ്ഞതും മെറിൻ ചിരിച്ചു..