അപരാജിതൻ -47 4918

തിരികെ വരും വഴി.

മുൻപൊരിക്കൽ തന്റെ കൈ നോക്കിയ കൈനോട്ടക്കാരി വൃദ്ധയെ അവിടെ കണ്ടു.

അവൾ, അവർക്കരികിലേക്ക് ചെന്നു

തന്റെ കൈ നോക്കി ഫലം പറയാൻ അവരോടു പറഞ്ഞു.

അവളുടെ കൈ നോക്കിയ നിമിഷം അവർ അവളോട് പറഞ്ഞു

“ഈ കൈയും മുഖലക്ഷണവും ഞാൻ മുന്നേ നോക്കിയതാണല്ലോ മോളെ ,,പ്രായമായെങ്കിലും എനിക്ക് നല്ലയോർമ്മയുണ്ട്.”

അവളതു കേട്ടു ഒന്ന് ഞെട്ടി.

“സാരമില്ല ,,അമ്മച്ചി നോക്കാം കേട്ടോ”

“നിനക്ക് മുന്നിൽ ഒരു മഹായോദ്ധാവ് വരും, മോളെ,,,

നിനക്ക് അവനോടു ഉള്ളുനിറഞ്ഞ അനുരാഗമുണ്ടാകും,,,”

അത് കേട്ടപ്പോൾ അവൾക്കേറെ സന്തോഷമായി.

“തന്നെ സഹായിക്കാൻ ഏഴു കടൽ കടന്നൊരു വീര൯ വരുമെന്ന് മറുത മുത്തി പറഞ്ഞത് വേഗത്തിലാക്കാൻ ക്ഷേത്രത്തിൽ വന്ന് ശങ്കരനോട് പ്രാർഥിച്ചത്, നടക്കാൻ പോകുന്നു , തന്റെ പ്രാർത്ഥന ശങ്കരൻ നടത്തിതരുമെന്നുറപ്പായി”

അവൾ സന്തോഷത്തോടെ എഴുന്നേറ്റു.

തന്റെ പേഴ്സിൽ നിന്നും നൂറുരൂപ അവർക്കു ദക്ഷിണയായി നൽകി.

അവരത് വാങ്ങിയപ്പോഴേക്കും അവൾ വേഗം അവിടെ നിന്നും നടന്നു ചെരുപ്പ് ധരിച്ചു കാറിനരികിൽ ചെന്നു തിരികെ മാളികയിലേക്ക് തിരിച്ചു.

@@@@@@

 

അന്നേ ദിവസം

സൂര്യോദയത്തിന് മൂന്നു മണിക്കൂർ മുൻപ്

ചൈനയുടെ നിയന്ത്രണത്തിലിരിക്കുന്ന തിബത്തിൽ

സമുദ്രനിരപ്പിൽ നിന്നും അനേകായിരമടി ഉയരെയുള്ള മഞ്ഞുമൂടിയ പർവ്വതനിരയിലൂടെ യോറി ഹയാബുസ എന്ന സമുറായി വീരൻ തനിക്കെതിരെ ശക്തിയിൽ വീശുന്ന അസ്ഥിമരവിപ്പിക്കുന്ന കൊടും തണുപ്പുള്ള കാറ്റിനെയും എങ്ങും പെയ്യുന്ന ഹിമപാതത്തെയും അവഗണിച്ചു നടക്കുകയായിരുന്നു.

അയാളുടെ കാലുകൾ ഓരോ അടികൾ വെക്കുമ്പോളും മഞ്ഞിൽ ആഴ്ന്നിറങ്ങി പുതഞ്ഞുപോകുന്നുണ്ടായിരുന്നു.