അപരാജിതൻ -47 4916

“ഇനിയുമൊരു മാർഗ്ഗമുണ്ട് യോറി,,അതീവശ്രദ്ധയോടെ ചെയ്യേണ്ടുന്ന ഒരു കർമ്മവിധി, അങ്ങനെ സംഭവിച്ചാല് നീയും ഒരു ബോധിസത്വനായി മാറും , അതിലൂടെ ഈ ആഗ്രഹിക്കുന്ന അപരാജിതത്വവും അമരത്വവും നേടി  ലോകത്തെ നിന്റെ കാൽചുവട്ടിൽ നിയന്ത്രണവിധേയമാക്കി നിർത്താനും സാധിക്കും”

അതുകേട്ടു അങ്ങേയറ്റം ആകാംക്ഷയോടെ യോറി കൈകൾ കൂപ്പി നാബോയുടെ പാദങ്ങളിൽ സ്പർശിച്ചു.

“പിതാമഹാ,,എനിക്ക് താങ്കൾ മാർഗ്ഗദർശിയാകണം,,എന്നെ നേരായ പാതയിലേക്ക് നയിക്കണം,,പറയു എന്താണ് ആ മൂന്നാമത്തെ മാർഗ്ഗം”

“നീ മഹാജ്ഞാനമണ്ഡലമായ ശംഗ്രിലയിൽ പ്രവേശിക്കണം,,

മഹാപ്രളയം  വന്നോ  മഹാവിസ്ഫോടനം സംഭവിച്ചോ ഈ പ്രപഞ്ചമാകെ ശൂന്യമായാൽ പോലും നിലനിൽക്കുന്നത് ഒന്ന് മാത്രമേയുള്ളൂ ,,

അതാണ് വിശിഷ്ട മഹാവിജ്ഞാന മണ്ഡലമായ സിദ്ധഭൂമിയായ ശംഗ്രില,,

സിദ്ധികളില്ലാത്ത മനുഷ്യർക്ക് ആർക്കും അതിൽ പ്രവേശിക്കാൻ സാധിക്കില്ല, പക്ഷെ അപരാജിതസൂത്രത്തിലുള്ള കർമ്മമാർഗ്ഗങ്ങളിലൂടെ അത് സാധിക്കും,, അതെന്തെന്ന് അറിയാൻ എനിക്കീ ഗൂഢഗ്രന്ഥം വായിക്കണം , അതിനായി നീ എനിക്കല്പം സമയം തരിക”

യോറി ശിരസ്സ് കുലുക്കി സമ്മതിച്ചു.

നാബോ ഒരു മണിക്കൂർ എടുത്ത് ഗാഢവും ഗഹനവുമായ വായനയിലൂടെ ആ ഗ്രന്ഥത്തിനുള്ളിൽ പ്രതിപാദിച്ചിരിക്കുന്ന ക്രിയാമാർഗ്ഗങ്ങൾ വായിച്ചു മനസ്സിലാക്കി.

ആ ഗ്രന്ഥം വായിക്കുമ്പോൾ അദ്ദേഹത്തിന്റെ മുഖത്ത് അത്ഭുതം വിരിയുന്നത് നിരവധിപ്രാവശ്യം  യോറി കാണുകയുണ്ടായി.

വായനയ്ക്ക് ഒടുവിൽ ഗ്രന്ഥം മടക്കിവെച്ച് കണ്ണുകളടച്ചു നാബോ ഏറെ നേരം ഇരുന്നു.

ശേഷം കണ്ണുകൾ തുറന്നു യോറിയെ നോക്കി പുഞ്ചിരിച്ചു.

“ഈ മഹാജ്ഞാനം മനസ്സിലാക്കാൻ ഈ വൃദ്ധന് നിന്നിലൂടെ സാധിച്ചല്ലോ , മകനെ ,,എന്നുമീ വൃദ്ധന്റെ പ്രാർത്ഥനയും അനുഗ്രഹവും നിനക്കൊപ്പമുണ്ടാകും”

നാബോ ആ ഗ്രന്ഥത്തെ നമസ്കരിച്ചു.

“യോറി,,ഈ ഗ്രന്ഥവും  മൂന്നു വജ്രകളും കൈയിലേന്തി എന്നെയും ചുമലിലേറ്റി നീ വരിക , സൂര്യോദയത്തിനു മുൻപായി നമുക്ക് മുകളിലേക്ക് പോകണം,,മൂന്നു പർവ്വതനിരകൾക്ക് മേലെയാണ് അറിവിലേക്ക് നമ്മളെ നയിക്കുന്ന പുണ്യഭൂമി”