അപരാജിതൻ -47 4916

“ഓർമ്മ വന്നില്ലേ നിനക്ക്,,നാമരുളിയ വാക്കുകൾ”

“ഉവ്വ് ,,പ്രഭോ എല്ലാം എനിക്കോർമ്മയുണ്ട്”

“ആയിരം സംവത്സരങ്ങൾക്ക് മുൻപ് ഞാൻ നിന്നെ അങ്ങനെയൊരു സവിശേഷ ജന്മം പിറവി എടുത്തത് തോന്നിപ്പിച്ചതല്ലേ,,എന്നിട്ടോ ”

ഭൈരവൻ നിർന്നിമേഷനായി ശ്വാസമെടുത്തു.

“എന്നെ നശിപ്പിച്ചു കളഞ്ഞില്ലേ,, എന്റെ സകലസ്വപ്നങ്ങളും ഇല്ലാതെയാക്കി കളഞ്ഞില്ലേ ,എന്നെ ആ രാജകുമാരിയെ നേടാൻ സമ്മതിക്കാതെ നിഷ്ടൂരമായി എന്നെ കൊന്നു കളഞ്ഞില്ലേ ,,എന്റെ കൈ വേറെ, കാൽ വേറെ, ഉടൽ ,  ശിരസ് വേറെ ,,വയറു കീറി കുടൽ പൊട്ടിച്ചു ഹൃദയം വലിച്ചു കീറി,,മൃഗീമായി കൊന്നു കളഞ്ഞില്ലേ എന്നെ”

കോപത്തോടെ വികടാംഗ ഭൈരവൻ ഒന്ന് നിർത്തി..

“അവൻ ,,,

അലിവോ അനുകമ്പയോ ഇല്ലാത്ത കിരാതൻ,

അപരാജിതൻ”

അപരാജിതനെന്ന

കൊടുംകിരാതൻ”

ഉള്ളിലെ കോപം പല്ലുകൾ കൊണ്ട് കടിച്ചമർത്തി വികടാംഗ ഭൈരവൻ പറഞ്ഞു.

“ആ സവിശേഷജന്മം തന്നെയാണ് അംഗഭൈരവാ വീണ്ടും പുനർജനിച്ചിരിക്കുന്നത്,,അതും നിനക്കറിയാവുന്നതല്ലേ,,”

“അറിയാം പ്രഭോ,,, അവനുമുണ്ട് അവൾക്ക് തുണയായി,,അവനെ ഞാനൊരിക്കലൂം മറക്കില്ല,,അന്നത്തെ ആ പൈശാചികത ഇന്നുമുണ്ട് അവന്റെ മുഖത്ത്,” നിസ്സഹായതയോടെ വികടാംഗഭൈരവൻ പറഞ്ഞു.

“അംഗഭൈരവാ,,,നിനക്ക് ശാപമോക്ഷം വേണമെങ്കിൽ ഇത്തവണ നീ വിജയിച്ചേ മതിയാകൂ,,,പ്രേതകായ വിദഹത്യോപാസന ചെയ്ത നിനക്ക് നാമിതാ ആയിരം ചെന്നായ്ക്കളുടെ ശക്തി നൽകുന്നു,,

നിനക്ക് വികടാംഗഭൈരവനായും ചെന്നായ് ആയും രൂപം മാറുവാനുള്ള പരരൂപപ്രവേശ സിദ്ധിയും നാം അരുൾ നൽകുന്നു,,അതിലൂടെ ഏതു മൃഗീയതയുള്ളവനെയും നിനക്ക് പരാജയപ്പെടുത്താൻ സാധിക്കും ,,സമയമാകും വരെ കാത്തിരിക്കുക,,അവളിലൂടെ ആര്യതാരയുടെ തേജസ്സ് നമ്മിലേക്ക് സമർപ്പിക്കുക”

അശരീരി മറഞ്ഞു.

ആഹ്ലാദത്തോടെ ജീർണ്ണിച്ച അസ്ഥികൂടമായ  വികടാംഗഭൈരവ൯ എഴുന്നേറ്റു.

മാരയെ സ്തുതിച്ചു,

അയാൾ ഇരു വശത്തേക്കും കൈകൾ വിടർത്തിപിടിച്ചു ശ്വാസമെടുത്തു.