അപരാജിതൻ -47 4916

അന്നേ ദിവസം പുലർച്ചയ്ക്ക് മുൻപ് തന്നെ:

പാർവ്വതിയെ ആഭിചാരക്രിയകളിലൂടെ ആകർഷിച്ചു കൊണ്ട് വരാൻ തന്റെ കിങ്കരൻമാരായ കഴുകന്മാരെ വിട്ടപ്പോൾ, കൃഷ്ണപരുന്തും മറ്റു പരുന്തിൻകൂട്ടങ്ങളും ആ കഴുകന്മാരെ മുച്ചൂടും കൊത്തിവലിച്ചു കൊലപ്പെടുത്തിയതിനാൽ, തന്റെ പ്രധാന ശക്തിസ്രോതസ്സുകൾ ഇല്ലാതെയായ വികടാംഗഭൈരവൻ, തന്റെ ആവാസ ഗുഹാസ്ഥാനത്ത് പ്രേതശരീരങ്ങളൾക്കൊപ്പം മണ്ണിൽ കിടന്നു സ്വയം ജീർണ്ണത  വരുത്തി തന്റെ  ആരാധനാമൂർത്തിയെ പ്രീതിപ്പെടുത്തി, ലക്ഷ്യപ്രാപ്തിക്കായി പതിന്മടങ്ങ് ശക്തി കൈവരിക്കുവാനുള്ള ദീർഘകാലത്തെ  പ്രേതകായ വിദഹത്യോപാസന അനുഷ്ടിച്ചു കൊണ്ടിരിക്കുന്ന സമയം.

ഗുഹയിലാകെ പാമ്പുകളും   കരിന്തേളുകളും മുഷ്ടി വലുപ്പമുള്ള പെരുന്താനാട്ടകളും കൈപ്പത്തി വലുപ്പമുള്ള പഴുതാരകളൂം അടക്കമുള്ള അറപ്പുളവാക്കുന്ന ജീവികൾ പെരുകിയിരുന്നു.

ഗുഹയ്ക്കുള്ളിൽ ചെന്നായ്ക്കൾ കൂട്ടം കൂടി ഉച്ചത്തിൽ ഓരിയിട്ടുകൊണ്ടിരുന്നു.

പുറത്ത് കോരിച്ചൊരിയുന്ന മഴയും ഇടിമിന്നലും.

അത്യുഗ്രശക്തിയിൽ മണ്ണിലേക്ക് വെട്ടിയിറങ്ങുന്ന മിന്നൽ ആ ഗുഹയെ വിറപ്പിച്ചുകൊണ്ടിരുന്നു.

ഗുഹാന്തർഭാഗത്ത് ഒഴുകുന്ന ലാവയുടെ അരുവിക്ക്  താപം കൂടുതലായിരുന്നു , ആ താപം ഗുഹയ്ക്കുള്ളിലെ സകല വസ്തുവകളെയും ജീവജാലങ്ങളേയും ചൂട്പിടിപ്പിച്ചു.

വികടാംഗഭൈരവൻ വെച്ചാരാധിച്ചുപോരുന്ന  ഭീതിയുണർത്തുന്ന രൂപമുള്ള ഉപാസനമൂർത്തിയുടെ കൽവിഗ്രഹത്തിനുള്ളിൽ നിന്നും കറുത്ത കനത്ത പുക ഉയരാനാരംഭിച്ചു.

അതോടെ ഗുഹയുടെ ഉള്ളിലെ കരിങ്കൽപ്പാളികൾ കുലുങ്ങി.

“അംഗഭൈരവാ,,,,”

കർണ്ണഠോരശബ്ദത്തിൽ അശരീരി മുഴങ്ങി.

ആ ശബ്ദത്തിന്റെ ഉഗ്രഗാംഭീര്യത്തിൽ ഗുഹയിലെ പാറകൾ പിളർന്നു.

അത് കേട്ട് ചെന്നായ്ക്കൾ ഭയത്തോടെ ഓരിയിട്ടു.

ഗുഹാമുഖം പുറത്തുള്ള  മരം കടപുഴകിവീണടഞ്ഞു.

ഗുഹയ്ക്കുള്ളിൽ നരിച്ചീറുകൾ അങ്ങിങ്ങായി പറന്നു.

പ്രേതകായവിദഹത്യോപാസന അനുഷ്ഠിക്കുവാനായി നിർമിച്ച ശവശരീരങ്ങൾ ഇട്ടു മൂടിയ കുഴിയുടെ പുറത്തേക്ക് ഒരു ഭയങ്കരമായ കൈപത്തി ഉയർന്നു.

മാംസം വിഘടിച്ച് പുഴുക്കളരിക്കുന്ന കൂർത്ത ആകൃതിയിലുള്ള ഒരു മനുഷ്യകൈ.