അപരാജിതൻ -47 4918

ശങ്കരന് ഭസ്മാഭിഷേകം ചെയ്തു പ്രാർത്ഥിച്ചാൽ ഉള്ളിലെ ഭയവും വിഷമങ്ങളും വേഗം മാറുമെന്നും ആഗ്രഹിക്കുന്നത് നടക്കാൻ സാധ്യതയുള്ളത് ആണെങ്കിൽ എളുപ്പം നടക്കുമെന്നും അവൾ കേട്ടറിഞ്ഞിട്ടുണ്ട്.

കാര്യദർശി നൽകിയ ഭസ്മം അടങ്ങിയ പാത്രവുമായി അവൾ ശ്രീകോവിലിനു മുന്നിൽ വന്നു നിന്നു.

അപ്പോൾ മാത്രമാണ് , അവളുടെ ഉള്ളിലെ ഭയം അൽപ്പമെങ്കിലും അടങ്ങിയത്.

അവൾ ഭസ്മപാത്രം മാറോടു ചേർത്ത് കണ്ണുകളടച്ചു മഹാദേവനോട് കേണുപ്രാർത്ഥിച്ചു.

“ശങ്കരാ,,, മഹാദേവാ

അൽപ്പമെങ്കിലും എന്നോട് അനുകമ്പ കാണിക്കണേ,,

എന്നെ എന്നും കീഴ്പ്പെടുത്തിയിരുന്ന ആ യുവാവ് ഇതാ എന്റെ അരികിൽ തന്നെ എത്തിയിരിക്കുന്നു.

അവനെന്റെ മുന്നിൽ പിടഞ്ഞു മരിക്കുന്നതെനിക്ക് കാണണം,

അതിനായി എന്നെ സഹായിക്കാൻ ഏഴുകടലും കടന്നൊരു വീരനെത്തുമെന്നു പഞ്ചവൻ കാട്ടിലെ മറുതമുത്തി എന്നെ അടിമകിടത്തി വേതാളവെളിപാട് ചൊല്ലിയിരുന്നു,,

എത്രയും വേഗം ആ വീരനെ എനിക്ക് മുന്നിൽ കൊണ്ടെത്തിച്ചു തരണേ എന്റെ ശങ്കരാ,,

വൈശികത്തിൽ വൈദഗ്ദ്യം നേടിയതിനു ശേഷം ഒരു പുരുഷനും വേഴ്ചക്കായി  നൽകാത്ത എന്റെയീ ഉടൽ

ആ ഏഴുകടൽ കടന്നെത്തുന്ന മഹാവീരന് ഞാൻ സമർപ്പിക്കാം,,

എന്റെ മഹാദേവാ,,

ഈയുള്ളവളുടെ പ്രാർത്ഥന കേൾക്കാതെ പോകല്ലേ,,

എനിക്ക് വിളിച്ചപേക്ഷിക്കാൻ നീയല്ലാതെ മറ്റാരുമില്ല

കൈവിടരുതേ എന്നെ”

നനയുന്ന മിഴികളോടെ അമ്രപാലി മഹാദേവനോട് കരുണയ്ക്കായി അപേക്ഷിച്ചു പ്രാർത്ഥിച്ചു.

ഭസ്‌മടങ്ങിയ പാത്രം നടയിൽ കൊണ്ട് വന്നു സമർപ്പിച്ചു.

ഉള്ളിലെ പൂജാരി അതെടുത്ത് അവിടത്തെ സ്വരൂപത്തിനു ശിരോഭാഗത്ത് അമ്രപാലി പ്രാർത്ഥിച്ചു നൽകിയ ഭസ്മം മന്ത്രജപത്തോടെ സമർപ്പിച്ച് ഭസ്മാഭിഷേകം നടത്തി. പ്രസാദമായി അതിൽ നിന്നും അൽപ്പം ഭസ്മം ഇലയിലാക്കി അവൾക്കു കൊണ്ട് വന്നു കൊടുത്തു, എന്നും കുളി കഴിഞ്ഞു ആ ഭസ്മം നെറ്റിയിൽ ചാർത്തുവാൻ ഉപദേശിച്ചു.

ദക്ഷിണയും വഴിപാടും സമർപ്പിച്ചവൾ, പ്രദക്ഷിണവും ഉപദേവതാ ദർശനവും നടത്തി.