അപരാജിതൻ -47 4917

അന്നേരം

ഒരു ചിറകടിശബ്ദം കേട്ടു, പാർവ്വതി  ജാലകത്തിനടുത്തേക്ക് നോക്കി.

ഒരു പരുന്ത് അവിടെ നിന്നും പാറിപ്പോകുന്നു.

അവൾ തീർച്ചപ്പെടുത്തി

സ്വപ്നം കണ്ടതും ദേഹത്തുള്ള ക്ഷതങ്ങളും ഇപ്പോ കിട്ടിയ രുദ്രാക്ഷവുമെല്ലാം മയിൽപ്പീലികളും എല്ലാം വിഷ്ണു മായ തന്നെ, അതിൽ മയിൽപ്പീലിയും രുദ്രാക്ഷവും രാത്രി ചിലപ്പോൾ കൃഷ്ണപരുന്ത് കൊണ്ട് ഇട്ടതായിരിക്കുമെന്നും അവൾ കരുതി.

അപ്പുവിനെ ഒന്ന് വിളിക്കണമെന്നുണ്ട്.

പക്ഷെ ആ സ്വരം കേട്ടാൽ തനിക്കാകെ ലജ്ജയാകും എന്നോർത്തു തത്കാലം അവൾ മൊബൈൽ എടുത്തു

I love you എന്നൊരു മെസ്സേജ് ടൈപ്പ് ചെയ്തു.

അയക്കാൻ മടിച്ചിട്ട് അവൾ ഫോൺ അരികിൽ തന്നെ വെച്ചു.

ആ രുദ്രാക്ഷം തന്റെ വലത്തേ മണിബന്ധത്തിൽ കെട്ടിയ അവ്വയാർ മുദ്രയായ ഗൗരിശങ്കരത്തിനൊപ്പമായി ചുറ്റിക്കെട്ടി.

എങ്കിലും അവൾക്കറിയില്ലായിരുന്നു , അത് ശിവശൈലത്തെ അയ്യനാർ തന്റെ കണ്ഠത്തിലണിയുന്ന രുദ്രാക്ഷമാണെന്ന്.

@@@@@@

മുത്ത്യാരമ്മയുടെ മാളികയിൽ

സൂര്യോദയത്തിനു മുന്നേ തന്നെ അമ്രപാലിയുണർന്നു.

തലേന്ന് രാത്രി, ചിത്രത്തിലെ യുവാവിനെ കുറിച്ചോർത്ത് അവളുടെ ഉറക്കം ഭൂരിഭാഗവും നഷ്ടമായിരുന്നു.

പുലരിയിലെപ്പോഴോ ഒന്ന് മയങ്ങിയതാണവൾ.

തനിക്കരികിൽ കിടന്നുറങ്ങിയ ചാരുവിനെ ഉണർത്താതെ അമ്രപാലി കുളിച്ചുവസ്ത്രം മാറി മാളികയ്ക്ക് പുറത്തേക്ക് ഇറങ്ങി.

പുറത്ത് ചായിപ്പിൽ കിടന്നുറങ്ങുന്ന അവിടത്തെ ഡ്രൈവർ ചെമ്പാരിയെ വിളിച്ചുണർത്തി.

അയാളോട് മുൻപ് പോയിരുന്ന ശങ്കരൻകോവിലിൽ കൊണ്ട് പോകണെമന്നു പറഞ്ഞു.

ചെമ്പാരി, അല്പസമയത്തിനുള്ളിൽ കാറുമെടുത്ത് അമ്രപാലിയെ ശങ്കരൻകോവിലിലേക്ക് കൊണ്ട് പോയി.

അമ്രപാലി, കാറിൽ നിന്നുമിറങ്ങി പാദുകമൊതുക്കി വേഗം ക്ഷേത്രത്തിലേക്ക് പ്രവേശിച്ചു.

അവളുടെ പേരിൽ ഒരു ഭസ്മാഭിഷേകം എഴുതിച്ചു.