അപരാജിതൻ -47 5203

കാലചക്രം രണ്ടു  സഹസ്രാബ്ദം പിന്നിലേക്ക് സഞ്ചരിക്കുമ്പോൾ

ഹിമാലയതാഴ്വരകളോട് ചേർന്നുള്ള കപിലവസ്തു ദേശത്ത് (നേപ്പാളിൽ)

പശുപതീശ്വരനെ പൂജ ചെയ്തു നിത്യവൃത്തി കഴിഞ്ഞു കൂടുന്ന ഒരു വൈദികദമ്പതികൾക്ക്  പത്തു പെൺമക്കളായിരുന്നു.

ഒരു സൽപ്പുത്രൻ ജനിക്കാത്തതിന്റെ വിഷമത്തോടെ ജീവിച്ചിരുന്ന ആ ദമ്പതിമാർക്ക് ഒരിക്കൽ ഒരു സ്വപ്നവെളിപാടുണ്ടായി.

അപ്രകാരം അവർ തങ്ങൾക്കൊരു സൽപ്പുത്രൻ ജനിച്ചാൽ  അവൻ വളരുമ്പോൾ പശുപതീശ്വര ക്ഷേത്രത്തിൽ നിത്യബ്രഹ്മചാരിയായ ഉപാസകനായി പൂജാദികർമ്മങ്ങൾ ചെയ്യിപ്പിക്കുമെന്നും അവർ പശുപതീശ്വരന് പ്രാർത്ഥനായി വാഗ്ദാനം നൽകി,

ഒരു മാസത്തിനുള്ളിൽ സ്ത്രീ ഗർഭിണിയായി.

പത്തു മാസം തികഞ്ഞവർ പതിനൊന്നാമതായി ഒരു പുത്രന് പിറവികൊടുത്തു.

കുഞ്ഞിനെ പശുപതീശ്വരന് മുന്നിൽ കൊണ്ട് വന്നു നന്ദിയർപ്പിക്കുകയും അവനു അംഗഭൈരവൻ എന്ന് നാമമിടുകയും ചെയ്യുകയുണ്ടായി.

അവരുടെ നല്ല പരിചരണത്തിൽ അംഗഭൈരവൻ വളർന്നു.

സർവരെയും വശ്യപ്പെടുത്തും വിധമുള്ള സൗന്ദര്യമായിരുന്നു അംഗഭൈരവന്.

അംഗഭൈരവന്റെ സൗന്ദര്യം ദേശവും ദേശങ്ങൾക്കപ്പുറവും കീർത്തി പ്രാപിച്ചു.

അംഗഭൈരവൻ നൃത്തവും സംഗീതവും അഭ്യസിച്ചു.

അവനു കുലധർമ്മമായ വൈദികവൃത്തിയിൽ തീരെ താൽപ്പര്യമില്ലായിരുന്നു.

കുലധർമ്മമനുസരിച്ച് വൈദികകർമ്മങ്ങൾ അനുഷ്ട്ടിച്ചു പൂജയും ഉപാസനകളുമായി ജീവിക്കുവാൻ മാതാപിതാക്കൾ അംഗഭൈരവനെ ഒരുപാട് നിർബന്ധിച്ചുവെങ്കിലും അവനതിന് വഴങ്ങിയില്ല.

തന്റെ സൗന്ദര്യത്തിലും കഴിവിലും അവനേറേ അഹങ്കരിച്ചു.

നൃത്തവും സംഗീതവും അവനു ധനവും സുഹൃത്തുക്കളെയും നൽകി.

ധനാഢ്യമായ ജീവിതസഹചര്യങ്ങളിൽ മതിമയന്ന അംഗഭൈരവൻ പൂർണ്ണമായും ഒരു ദുർമാർഗ്ഗിയായി മാറി.

അവന്റെ സൗന്ദര്യത്തിലും നൃത്തത്തിലും സംഗീതത്തിലും  മതിമയങ്ങുന്ന സ്ത്രീകളുമായി അവൻ രമിച്ചുജീവിച്ചു.

അവനാൽ ഭോഗിക്കപ്പെടുവാൻ ദേശപരദേശനങ്ങളിലെ സുന്ദരാംഗനമാർ മത്സരിച്ചുമോഹിച്ചു.

അംഗഭൈരവൻ പലരെയും വഞ്ചിച്ചു ധനം സ്വരുക്കൂട്ടി.

മദ്യത്തിലും മറ്റുലഹരികളിലും അടിമയായി മാറി.

ലഹരികളിൽ അടിമപ്പെട്ടുപോയ അവനു നൃത്തത്തിലും സംഗീതത്തിലുമുണ്ടായിരുന്ന പ്രാഗൽഭ്യം ഇല്ലാതെയായി.