അപരാജിതൻ -47 5203

ജലാശയത്തിനരികിൽ കണ്ട കാഴ്‌ച കണ്ട് “പിതാമഹാ ” എന്ന് അലറി വിളിച്ചു കൊണ്ട് യോറി ചോരയൊലിച്ചു കിടക്കുന്ന നാബോയുടെ അടുത്തേക്ക് ചെന്ന് ഇരുന്നു.

കൈയിലുണ്ടായിരുന്ന മൂന്നു വജ്രകളിൽ ഒന്ന് ഹൃദയത്തിലും മറ്റൊന്ന് കണ്ഠനാളത്തിലും മറ്റൊന്ന് ഉദരത്തിലും കുത്തിയിറക്കി പാൽഡൺ ലാമോ ദേവിയെ പ്രസാദിപ്പിക്കാൻ സ്വയം ബലി നൽകിയാതായിരുന്നു നാബോ.

വിറയ്ക്കുന്ന കൈകളോടെ ഇടറുന്ന ശബ്ദത്തോടെ വൃദ്ധനായ നാബോ , തന്റെ സ്വയം ബലി സമർപ്പണത്തിൽ സംപ്രീതയായി , ലാമോ ദേവി ജലാശയത്തിൽ വ്യക്തമായി കാണിച്ചു നൽകിയ എല്ലാ വിവരങ്ങളും യോറിയ്ക്ക് പറഞ്ഞു കൊടുത്തു.

ആരാണ് ആ യുവാവ് , ആരാണ് ആ നാഗകന്യകയായ യുവതി, എവിടെയാണ് അവർ , കണ്ടുകിട്ടാനുള്ള രണ്ടു വജ്രകൾ എവിടയെയാണ് , ചിന്താമണി നേടിയാൽ അതിനെ വശമാക്കാൻ അഞ്ചു വജ്രകളും കൊണ്ട് അനുഷ്ഠിക്കേണ്ട കർമ്മങ്ങൾ,, അത് പറഞ്ഞപ്പോളാണ് നാബോ മറ്റൊന്ന് കൂടെ ഓർമ്മിച്ചുപറഞ്ഞത്.

“യോറി,,അഞ്ചു വജ്രകൾ മാത്രമല്ല, അവയെ സൂക്ഷ്മമായ തലത്തിൽ പ്രണവ നാദം കൊണ്ടാണ് പരസ്പരം ബന്ധിപ്പിച്ചിരിക്കുന്നത്, അവയെ നിയന്ത്രണവിധേയമാക്കുവാൻ ഒരു മണി കൂടെ രഹസ്യമായി ബോധിസേനൻ നിർമിച്ചിരുന്നു, അത് മറ്റൊരിടത്താണ് സൂക്ഷിച്ചിരിക്കുന്നത്, പഞ്ചഭൂതങ്ങളായ അഞ്ചു വജ്രകളും അതിന്റെ സൂക്ഷ്മതലത്തിൽ പ്രണവനാദത്താൽ ബന്ധിച്ചിരിക്കുന്ന മണിയും കൊണ്ട് വേണം ചിന്താമണിയെ നിയന്ത്രണത്തിലാക്കാൻ”

തന്റെ മരണമായി എന്നുറപ്പിച്ച വൃദ്ധനായ നാബോ ശ്വാസമെടുക്കാൻ ബുദ്ധിമുട്ടി കൊണ്ട് യോറിയുടെ കൈകളിൽ മുറുകെ പിടിച്ചു.

യോറി , സങ്കടത്തോടെ അലറികരയുകയായിരുന്നു.

“യോറി,, സമുറായി വീരനായ എന്റെ കൊച്ചുമകനിൽ എനിക്ക് വിശ്വാസമുണ്ട്, അവിടെ നീ പോകണം , ഇരുപതിൽ അധികം ഭാഷകൾ അറിയുന്ന നിനക്ക് അവിടത്തെ ഭാഷയുമറിയുമല്ലോ,,ആ യുവാവിനെ ഇല്ലാതെയാക്കി ചിന്താമണി നീ നേടിയെടുക്കണം,,അതിലൂടെ നീ ശംഗ്രിലയിൽ പ്രവേശിക്കണം , ശംഗ്രിലയെ നീ ഭരിക്കണം, നീ അജയ്യനാകണം , അമരനാകണം , അപരാജിതനാകണം,  ബോധിചിത്തനാകണം, ഈ ലോകത്തെ സൃഷ്ടി സ്ഥിതി സംഹാരങ്ങളെല്ലാം  നീ നിയന്ത്രിക്കണം,, എനിക്ക് നീ വാക്കു നൽകൂ ”

നാബോ മരണത്തിലേക്ക് എത്തും മുൻപ് വിറയലോടെ  ശ്വാസമെടുത്ത്  യോറിയുടെ കവിളിൽ തലോടി.

“സത്യം ,,,എന്റെ പിതാമഹാ,,,അങ്ങയുടെ എല്ലാ ആഗ്രഹവും ഞാൻ സഫലമാക്കും ,,,യോറി അങ്ങേക്ക് നൽകുന്ന സത്യമാണ്, അങ്ങയുടെ സ്വയം ബലി ഒരിക്കലൂം വ്യർഥമാകില്ല,,അങ്ങ് ആഗ്രഹിച്ചതെല്ലാം ഞാൻ നേടിയെടുക്കും””

കരഞ്ഞു കൊണ്ട് അയാളുടെ കൈകളിൽ മുറുകെപിടിച്ചു യോറി പറഞ്ഞു.

ഒരു പുഞ്ചിരിയോടെ നാബോ , മൃത്യുവിനെ പുൽകി.